Prokuroria nuk bën transparencë; Fshihet pas “sekretit hetimor”

Pjesa e reformës në drejtësi që garanton transparencën e sistemit për publikun, nuk funksionon. Ligji i ri për Prokurorinë përcakton që një prokuror duhet të mbajë marrëdhëniet me mediat, por në fakt, komunikimi publik është përkeqësuar.

Prokuroria fshihet pas frazës klishe “sekret hetimor” edhe kur pyetjet, siç është rasti i Top Channel, nuk cenojnë hetimet:

1. Referuar të drejtës së informimit, ju lutemi na vendosni ne dispozicion të dhëna me interes për publikun për shtetasin Adriatik Llalla. Për çfarë vepre është regjistruar hetimi ndaj zotit Llalla dhe kush është prokurori që po e heton këtë çështje?

2. Sa më sipër jeni të lutur, të na bashkangjisni procedurën e shortimit të kësaj dosjeje, kush janë prokurorët që e kanë nën shqyrtim këtë çështje. Na informoni me çfarë emri është regjistruar dosja numër 447 e përcjellë nga Prokuroria Durrës dhe për çfarë vepre?

3. Jemi te interesuar për çështjen ndaj shtetasit Saimir Tahiri, etj. Pse e keni shtyrë afatin e hetimeve dhe a e keni pyetur Saimir Tahirin pas seancës gjyqësore të dhjetorit 2017?

4. Kur do thërritet shtetasi Saimir Tahiri? Ju lutem na vendosni në dispozicion orën dhe datën e saktë.

Të katra pyetjet janë me interes të lartë publiK dhe ato nuk përbejnë sekret hetimor, sepse nuk hyjnë në thelbin e dosjes dhe nuk sjellin dëm të hetimeve sikurse pretendon Prokuroria e Krimeve të Rënda. Nëse ka një akuzë për Adriatik Llallën dhe cila është ajo, por edhe si janë përzgjedhur 2 prokuroret për ta hetuar, kjo jo vetëm nuk nuk përbën sekret hetimor, por është detyrim i Prokurorisë së Krimeve të Rënda që të informojë publikun për gjendjen penale të ish-Prokurorit të Përgjithshëm.

Për shkak se Saimir Tahiri nuk është pyetur deri më tani ndonëse kanë kaluar mbi gjashte muaj, dhe nëse do të thirret për t’u marrë në pyetje, nuk cënon asnjë veprim hetimor që të klasifikohet si sekret, por është thjesht një referencë kohore në axhendën e Prokurorisë.

Me interes të lartë publik dhe që nuk zbulon veprimet hetimore është edhe pyetja se perse nuk është pyetur Dritan Zagani, që është njëri nga denoncuesit publike kundër ish-ministrit.

Ashtu si edhe kërkesa për të marrë informacion pas denoncimit të shtetasit me iniciale B.D, nga Shkodra, të cilit prej një viti i ndalohet të dalë jashtë shtetit, ndonëse porositësit për vrasjen e kryekomisarit Artan Çuku janë shpallur në kërkim me vendim gjykate. Top Channel iu drejtua Krimeve të Rënda përmes Prokurorit të medias me 7 kërkesa të tilla, për të cilat mori heshtje dhe në fund ruajtjen e sekretit hetimor, që ndonëse përdoret si mburojë ai është i tillë vetëm kur del nga aktet e dosjes.

Burime jozyrtare pohuan për Top Channel se ka një argument tjetër pse sekreti hetimor përdoret si justifikim për të mos bërë transparencë. Këto burime vënë në dyshim aftësinë e organit të akuzës për të ecur përpara me dosjet e rënda që kanë nën hetim. Dhe derisa Prokuroria të bëjë transparencë, ky mbetet opsioni më i besueshëm.

Top Channel