Dëshmon dhëndri i Trump. Kushner: Nuk jam mpleksur me Rusinë

Pasi ka dhënë dëshminë e tij përpara panelit të Senatit që heton influencën e dyshuar ruse në zgjedhje, Jared Kushner ka deklaruar për mediat se të gjitha aksionet e tij kanë qenë “me vend” dhe ndodhën gjatë rrjedhës normale të ngjarjeve, duke iu referuar këtu fushatës.

Në një konferencë shtypi në oborrin e Shtëpisë së Bardhë, 36-vjeçari, bashkëshort i Ivanka Trump, ka mohuar gjithashtu çdo mpleksje me Rusinë.

Sa i takon dëshmisë së tij përpara panelit të Komitetit të Inteligjencës, ai ka theksuar se, ka qenë tërësisht transparent, duke ofruar të gjithë informacionin e kërkuar.

“Më lejoni të shprehem qartë, unë nuk u mpleksa me Rusinë. Askush tjetër nga stafi i fushatës nuk u mpleks. Unë nuk kam kryer kurrë veprime të papërshtatshme”, ka thënë Kushner.

Kushner është një këshilltar i hershëm i presidentit Trump dhe ka qenë në krye të strategjisë dixhitale të fushatës së tij. Pas dëshmisë përpara panelit të Senatit, ai do të shfaqet të martën përpara një komiteti të Dhomës së Përfaqësuesve.

Por para konferencës, përpara se edhe të hynte për të dhënë dëshminë e tij, Kushner tha se mund të ketë pasur 4 takime me përfaqësues rusë, por pa dhënë detaje të tjera.

Mediat ndërkombëtare e kanë interpretuar këtë si referim për takimet me avokaten ruse Natalia Veselinskaya, e cila thuhet se kishte informacione dëmtuese ndaj kandidates rivale Hillary Clinton.

Top Channel