Itali, mbante peng rumunen, pranga shqiptarit

Sipas raportimeve të mediave italiane, vajza, 18 vjeçe, mbahej e mbyllur në një kasolle prej thuajse tre javësh. Në të njëjtën banesë, policia ka arrestuar një 27-vjeçar shqiptar, i akuzuar për grabitjen e vajzës dhe për një tentativë vrasjeje.

23 shtatorin e kaluar, i riu kishte tentuar të vriste me thikë një bashkëkombas, në një rrugë në zonën e Novolit, po në Firence. Për të njëjtën tentativë vrasjeje është ndalur edhe një tjetër shtetas shqiptar.

Nga hetimet e policisë italiane ka rezultuar se vajza rumune, që kishte mbërritur në Itali vetëm pak kohë më parë, e njihte rrëmbyesin, me të cilin dyshohet se kishte pasur edhe një marrëdhënie.

Më 24 shtator autori e kishte marrë me forcë nga shtëpia e një shoqeje, ku 18-vjeçarja ishte strehuar për t’i shpëtuar. Të njëjtën ditë, shtetasi shqiptar kishte kërcënuar me thikë dhe më pas rrahur shoqen e vajzës së rrëmbyer, një prostitutë nga Amerika e Jugut.

Nuk përjashtohet që të dyja ngjarjet të jenë të lidhura me përplasjet mes grupeve kriminale shqiptare aktive në shfrytëzimin e prostitucionit.

Top Channel