Fleckenstein: Vështirë të gjesh fajtor, por PD gjen gjithmonë arsye

“E dija që dje në darkë dhe kam qenë deri sot në mëngjes në kontakt të vazhdueshëm telefonik me kolegët, me komisionerin Hahn. Nga distanca duket e vështirë të gjykosh, po qe se nuk do të jesh i padrejtë, por duket se të gjithë kanë besuar se kishin një rezultat të përbashkët dhe në fund kuptuan se sërish nuk ishte ajo e përbashkëta ajo që kishin arritur”, thotë Knut për “Deutsche Welle”.

Sipas tij, arsyet ishin fillimisht tek i ashtuquajturi proces i vetingut, çfarë roli kanë vëzhguesit ndërkombëtarë në procesin e përzgjedhjes së atyre që zgjedhin gjykatësit.

“Për këtë u ra dakord e po ashtu edhe për mënyrën se si duhet të veprohet nëse vëzhguesit ndërkombëtarë refuzojnë një kandidaturë. Pasi kjo u zgjidh, të gjithë kishim ndjesinë se pengesat e fundit ishin kaluar, por duket se Partia Demokratike i ka dhënë rëndësi faktit që kjo të aplikohej edhe në proceset e tjera të emërimit”, komenton Fleckenstein.

Por a nuk ishte sqaruar më parë një gjë e tillë?

“Ishte sqaruar fillimisht që duhej të funksiononte në bazë të një sistemi tjetër, por PD-ja ka pasur përshtypjen se e kishte bërë të qartë se kjo që u negociua vlen për të gjitha institucionet. Më duket se është e vështirë të kuptohet për njerëz normalë”, thotë Fleckenstein.

Vëmendja tani, sipas tij, do të përqendrohet tek ajo se çfarë do të arrijë sot Parlamenti. “Është e vështirë të gjesh një fajtor, por bie në sy fakti se opozita, gjithmonë kur është menduar se gjithçka u vu në vijë, sjell diçka të re në tavolinë”, vijon eurodeputeti.

Sa për qëndrimin e LSI-së, ai shprehet se procesi ka qenë kaq i vështirë dhe i mundimshëm.

“Ekspertë europianë, amerikanë, Komisioni i Venecias, të gjithë kanë punuar për nje zgjidhje, ndaj edhe edhe nëse nuk ka dakordësi për ndonjë detaj, ujdia e përgjithshme duhet të jetë kaq e madhe, saqë kush e do këtë reformë vërtet, thotë PO”, shton raportuesi.

Top Channel