Pas të shtënave pranë një xhamie në Hjuston, ku u qëllua një mjek një ditë më parë, myslimanët kanë kërkuar forcimin e masave të sigurisë.
Viktima, dr. Arslan Tajammul, një specialist okulist tek të 30-at, u dërgua me urgjencë në një spital të zonës ku mbetet në reanimacion.
“Individi që qëlloi mbi vëllanë tonë në kohën kur po shkonte në xhami për lutje, duhet gjetur. Ne i bëjmë thirrje shefit të policisë të mos lërë gur pa lëvizur derisa ky person të dalë përpara drejtësisë, dhe nëse i nevojitet ndihma jone, jemi të gatshëm t’ia japim në çdo çast”, tha Deric Muhammad, aktivist i komunitetit mysliman.
Mjeku sapo kishte parkuar makinën e po i drejtohej në këmbë xhamisë Madrasah Islamiah për faljen e parë të ditës, kur i zunë pritë dhe e qëlluan dy herë me armë zjarri. Tre agresorët u larguan nga vendngjarja në këmbë.
Zyrtarët italianë, ndërkohë, vizituan vendin e një tjetër episodi fatkeq të ndodhur gjatë muajit të shenjtë të Ramazanit, lokalin e kthyer në skenën e pengmarrjes së përgjakshme në Daka të Bangladeshit. Shtatë persona të armatosur mësynë bar-restorantin “Holey Artisan Bakery” të premten mbrëma e vranë 20 vetë, shumica të huaj. 9 prej viktimave ishin italianë.
“Është i trishtë rasti që na sjell këtu. Do të çojmë në shtëpi trupat e qytetarëve tanë. Një ngjarje fatkeqe. Patëm takime me zyrtarë vendas me të cilët u bë e qartë se bashkëpunimi mes Italisë dhe Bangladeshit do të vazhdojë. Sigurisht që duhet ta mposhtim terrorizmin global, por për ta bërë këtë, globale dhe e unifikuar duhet të jetë edhe përgjigjja”, tha Mario Giro, zëvendësministër i Jashtëm i Italisë.
Presidenti italian Sergio Mattarella tha se vendi i tij është në zi pas sulmit vdekjeprurës në Daka, e falenderoi vendet e tjera për solidaritetin e treguar pas ngjarjes tragjike.
Top Channel
