Kosovë, rihapet çështja e rrahjes së deputetit të PDK-së në 2012-n

15/04/2016 00:00

Gjykata Themelore në Prishtinë ka vendosur ta rihapë çështjen e rrahjes së deputetëve të Vetëvendosjes me deputetin e PDK-së, para Kuvendit të Kosovës më 28 qershor 2012.

Edhe pse të premten ishte parashikuar, që kryetari i trupit gjykues Hysen Ismajli të shpallte aktgjykimin, ai tha se ka vendosur të thërrasë edhe një seancë dëgjimore, për të dëgjuar ekspertin e Mjekësisë Ligjore, Arsim Gërxhaliu, kjo pasi raporti i tij për lëndimet e deputetit Bekim Haxhiu nuk është në përputhje të plotë me raportin e lëshuar nga Emergjenca.

Të akuzuarit e këtij rasti, kryetari i Vetëvendosjes Visar Ymeri dhe deputeti Rexhep Selimi, bashkë me shoferin Besfort Bujupi, nuk ishin të pranishëm në këtë seancë, ku mungoi po ashtu edhe prokurorja e rastit, ndërsa i pranishëm ishte vetëm deputeti i PDK-së, Bekim Haxhiu.

Kryetari i trupit gjykues tha se, seanca e radhës për të dëgjuar sërish raportin mjekoligjor do të mbahet më 20 prill, ndërsa pastaj pritet të shpallet aktgjykimi.

Top Channel