BBC: Vëllai i kryeministrit Mustafa kërkon azil në Gjermani

20/03/2016 00:00

Që mijëra shqiptarë, të Shqipërisë dhe Kosovës kërkojnë azil në Gjermani, nuk përbën më lajm, por kur një prej tyre është vëllai i Kryeministrit Mustafa, ky shndërrohet në lajm ndërkombëtar.

Rrjeti prestigjioz britanik BBC, duke ju referuar dhe mediave kosovare, shkruan se vëllai i Kryeministrit të Kosovës Isa Mustafa, Ragip Mustafa, ka kërkuar azil në Gjermani vitin e kaluar.

Pas publikimit të këtij lajmi dhe në mediat ndërkombëtare, Kryeministri Mustafa nëpërmjet profilit të tij në “Facebook”, e ka pranuar këtë fakt, por që sipas tij tashmë vëllai ndodhet në Kosovë.

“Kjo është e vërtetë. Jam informuar nga familja e vëllait, se ai kishte kërkuar qëndrim jashtë vendit, për t’u shëruar nga një sëmundje e rëndë, për të cilën nuk gjente shërim në Kosovë. Në vjeshtën e vitit që shkoi ka pasur një ndërhyrje në Tiranë, tani është në Prishtinë. Në valën e migrimeve, kanë shkuar edhe mbesa e nipa të mi dhe janë kthyer”, shkruan Mustafa, duke e mbyllur postimin e tij me angazhimin për të gjetur zgjidhje për liberalizimin e vizave për qytetarët e Kosovës.

Top Channel