Faturat e ujit, Bashkia shpjegon skemën e dëmshpërblimit

Këtë shqetësim ata e ngritën përmes një proteste, pas së cilës kreu i bashkisë, Erion Veliaj kërkoi nga Ndërmarrja e Ujësjellës Kanalizimeve rishikimin e faturave, ndërsa deklaroi se asnjë qytetar nuk do të paguante asnjë qindarkë mbi konsumin real të ujit të pijshëm.

Pasi konfirmoi se këto fatura ishin abuzive, kreu i Ujësjellës Kanalizimeve, Neritan Gjojdeshi e justifikoi mbifaturimin me një gabim njerëzor. Por pas kësaj deklarate erdhi menjëherë shkarkimi i tij dhe zëvendësimi me zotin Redi Molla.

Të mërkurën, Ndëmarrja e Ujësjellës Kanalizimeve njoftoi mënyrën se si do të kompensojë qytetarët për faturat e fryra. Ujësjellësi shpjegon edhe skemën sipas të cilës, të gjitha subjektet që e kanë paguar faturën do të kompensohen në faturën e çdo muaji në vazhdim, deri në likuidimin total të vlerës së paguar.

Ndërsa subjektet që nuk e kanë paguar ende këtë faturë do të marrin një faturë me vlerë minus, bashkë me faturën e muajit shkurt. Faturën e leximit real të muajit janar dhe atë të muajit shkurt, ata do të mund ta paguajnë deri në datën 28 mars, pa asnjë kamatë-vonesë.

Top Channel