Tre persona janë ndaluar dhe 5 të tjerë janë shpallur në kërkim nga policia e Tiranës, në lidhje me protestën e Partisë Demokratike për parkun e liqenit, që agravoji në përplasje fizike me uniformat blu.
Për disa orë u shoqërua në komisariat dhe ish deputeti demokrat Ndriçim Babasi, ndërsa policia e kryeqytetit, ka kallëzuar në prokurori edhe ish nënkryetarin e bashkisë Enno Bozdo, si përgjegjës për mbarvajtjen e protestës.
Në organin e akuzës janë referuar materiale edhe për 2 persona të tjerë, ndërsa gjatë paraditës së të martës, deputetë dhe mbështetës të Partisë Demokratike ishin pranë mjediseve të komisariatit nr. 1 ku janë shoqëruar protestuesit.
“Është i njëjti skenar si në protestën e 8 dhjetorit. Protestat janë të ligjshme, policia është e paligjshme me veprimet e saj që bën. Qytetarët po shkojnë në burg, ndërkohë në Parlament po kthehen kriminela”, tha Mimoza Hajdarmataj, deputete e PD-së.
Ndaj personave të shoqëruar, atyre të shpallur ne kërkim dhe ndaj të kallzuarve, rëndojnë akuzat e shkatërimit të pronës, thirrjes për veprime të dhunshme dhe kundërshtimit të punonjësit të rendit publik.
Për ish nën kryetarin e bashkisë, Enno Bozdo kjo është hera e dytë që kallzohet në prokurori pas protestës së 8 dhjetorit të kaluar, e cila përfundoi me djegien e bunkerit pranë Ministrisë së Brendshme.
Top Channel
