Super Bowl 50, nisin përgatitjet e finales

Me qindra punëtorë po punojnë për të krijuar ambientin më spektakolar të mundshëm në këtë impiant që u përurua në vitin 2013. Fjalën kryesore në këto përgatitje e ka padyshim teknologjia, gjë që u konfirmua edhe nga drejtori i Operacioneve të NFL-së, Erik Finkelstein: “Do të krijojmë një aplikacion të tillë që të gjithë tifozët të ndjejnë sa më mirë finalen e Super Bowl”.

Në të njëjtën kohë, Finkelstein theksoi se shpreson që moti i keq që ka mbërthyer SHBA-në të mos shkaktojë asnjë problem në ditën që do të luhet finalja e madhe e National Football League, një ndeshje kjo që kërkon edhe një kosto të lartë për ata që dëshirojnë ta shohin në shkallët e stadiumit. Mësohet se çmimi i biletave të radhëve të para në impiant arrin deri në 30 mijë dollarë, ndërsa bileta më e lirë shkon 3800 $. Përsa i përket marketingut, një publicitet prej 30 sekondash kap vlerën e 5 milionë dollarëve.

Sfida mes Denver dhe Carolina do të jetë përballja e mbrojtjes dhe sulmit më të mirë. Skuadra e Panthers ka shënuar 31.3 pikë për ndeshje, ndërsa Denver ka regjistruar mbulimin e 283.1 yard për ndeshje. Kjo ndeshje mund të bëjë që “quarterback”-u i Carolina, Cam Newton, të shënojë emrin e tij në historinë e futbollit amerikan. Nëse Panthers fiton, atërherë ai bëhet i pari sportist që triumfon në Kampionatin e Kolegjeve, Heisman Trophy, Super Bowl dhe çmimin MVP të National Football League.

Në të njëjtën kohë, kjo finale është edhe përballja mes sportistëve që në të kaluarën kanë qenë zgjedhjet e para në kampionat, Peyton Manning që ishte zgjedhja e parë në draftin e vitit 1998 dhe Cam Newton që u zgjodh i pari në Draftin e NFL në vitin 2011.

Top Channel