Partia Demokratike, përmes Enkelejd Alibeaj ka akuzuar ministrin e Brendshëm Saimir Tahiri se, 1 vit pasi deklaron se e ka shitur makinën, është shfaqur në timonin e saj në pikën kufitare të Kapshticës më 30 gusht 2014.
“Ndërsa më herët, më 16 gusht të të njëjtit vit, Tahiri dhe “AA 003 GB” shfaqen në pikën kufitare të Qafë Botës”, ka thënë Alibeaj duke iu referuar dokumenteve të sistemit TIMS.
“Këto janë faktet. Tahiri nuk e ka shitur makinën, ajo është pronë e tij dhe përdoret për trafikun e drogës. Ky mashtrim publik vërteton edhe njëherë përfshirjen e Tahirit në trafikun e drogës, madje drejtimin e tij, sepse garancia e Tahirit është imunitet për trafikantët”, ka thënë Alibeaj.
Duke theksuar se, ministri i Brendshëm është i zhytur në krim, ai ka nënvizuar se varianti i tij për shitjen e makinës është një shkelje e rëndë.
“Si rregull, prokuroria duhet të kishte nisur menjëherë marrjen nën përgjegjësi penale të ministrit të Brendshëm. Në këtë rast nuk ka as nevojë për hetime të thella, duke qenë se deklarata është bërë nga vetë ministri i Brendshëm”, ka thënë Alibeaj. Ai ka përsëritur kërkesën e opozitës se, “Tahiri duhet të largohet menjëherë nga detyra dhe duhet të hetohet deri në fund”.
Deklarata e plotë e kreut të Departamentit për Sigurinë dhe Rendin Publik të PD, Enkeleid Alibeaj
Fakte të reja provojnë mashtrimin kriminal të Saimir Tahirit, në lidhje me makinën e drogës AA003GB. Për të fshehur përfshirjen e tij të drejtpërdrejtë në krim, në trafikun e drogës që bëhej me makinën e tij private nga kushërinjtë habilaj, Tahiri tha se e kishte shitur mjetin në nëntor të vitit 2013.
E kishte shitur por nuk e kishte deklaruar, pra ministri kapet në informalitet. Por ja si është e vërteta. Më 30 gusht të vitit 2014, një vit pasi ai deklaron se e paska shitur makinën, Saimir Tahiri shfaqet në timon në pikën kufitare të Kapshticës pikërisht me audin AA003GB. Ja ku është dokumenti i sistemit TIMS, e keni edhe në ekran.
Më herët, me 16 gusht po të vitit 2014, Saimir Tahiri dhe e famshmja AA003GB, shfaqen në pikën kufitare të Qafë Botës. Dhe me 29 gusht të vitit 2014, sërish në Kapshticë, Saimir Tahiri me audin e tij AA003GB. Ja pra këto janë faktet. Saimir Tahiri nuk e ka shitur makinën. Ajo është prona e tij, dhe me të zhvillohet linja e trafikut të drogës, AA003GB.
Kur makinën e tij private nuk e përdorin kushërinjtë e tij Habilaj, kontigjentë policie, të njohur si trafikantët më të mëdhenj të drogës në Vlorë, e përdor Ministri i Brendshëm.
Ky mashtrim publik vërteton edhe një herë implikimin e drejtpërdrejtë të Saimir Tahirit në trafikun e drogës, madje komandimin e kësaj linje, pasi përdorimi i makinës së ministrit, është licencë, është imunitet, është garanci e paprekshmëri për bandën.
Saimir Tahiri po krijon alibi e gënjeshtra pa fund për këtë histori. Por ngado që rrotullohet ai është në krim. Edhe varianti i tij për ti ikur krimit të drogës, me shitjen e makinës por mosdeklarimin e saj, për shkak të vendimi gjyqësor ndaj tij, është një shkelje e rëndë.
Tjetërsimi i këtij sendi me vullnet (pra shitja e makinës) nga debitori, edhe pse është në dijeni të faktit se ajo është bllokuar për efekt të përmbushjes së detyrimit gjyqësor, përben vepër penale të parashikuar në nenin 320 të Kodit Penal.
Konkretisht, dispozita penale parashikon si më poshtë: Neni 320: Pengime për ekzekutimin e vendimeve të gjykatës; “Fshehja, tjetërsimi, konsumimi, dëmtimi apo shkatërrimi i sendeve për të cilat është marrë një vendim prej gjykatës, ose kryerja e veprimeve të tjera të bëra me qëllim që të mos ekzekutohet ose të pengohet ekzekutimi i vendimit gjyqësor, përbën kundërvajtje penale dhe dënohet me gjobë ose me burgim deri në dy vjet.”.
Qartësisht shitja e makinës është një veprim i bërë për të penguar ekzekutimin e vendimit gjyqësor të formës së prerë. Pra për të penguar drejtësinë. Si rregull, qoftë edhe vetëm pas këtij deklarimi publik Prokuroria duhet të kishte nisur menjëherë marrjen nën përgjegjësi penale të Ministrit të Brendshëm, për konsumimin e veprës penale të parashikuar nga neni 320 i Kodit Penal. Në këtë rast, nuk ka as nevojë për hetime të thelluara, duke qenë se deklarimi është bërë nga vetë Ministri i Brendshëm, i cili është vetëinkriminuar.
Ja ku jemi pra. Ministri i Brendshëm i zhytur në krim, në shkelje ligji, në mashtrim publik. Saimir Tahiri duhet të largohet menjëherë nga detyra, e të hetohet plotësisht dhe deri në fund. Çdo orë më shumë në detyrë, është një orë me shumë në pushtet, e krimit, e antiligjit.
Top Channel
