Kuvend, debat për televizionin publik, RTK

Bëhet fjalë për kryetarin e sindikatës, Fadil Hoxha, dhe zëvendësin e tij Arsim Halilin, gjithashtu redaktor në transmetuesin publik. Ata u larguan me vendim të drejtorit të Përgjithshëm, me arsyesimin se kanë dëmtuar imazhin e televizionit.

Shefja e grupit parlamentar të AAK-së, Donika Kada Bujupi tha se krijimi i një komisioni hetimor është i domosdoshëm, për shkak të dyshimeve të mëdha për keqpërdorime.

“Grupi parlamentar i Aleancës konsideron se është momenti i fundit, kur Kuvendi duhet të reagojë fuqishëm kundër së keqes në RTK, që po pengon përmbushjen e misionit të saj për informim të drejtë e të paanshëm të publikut, i cili është dhe financuesi i RTK-së”, tha Donika Kada Bujupi.

Nisma e opozitës nuk mori mbështetjen e PDK-së dhe LDK-së, pavarësisht se edhe vetë kryeministri Isa Mustafa, së fundi ka kritikuar ashpër RTK-në se është e ndikuar politikisht. Kjo, me arsyetimin se fillimisht duhet të analizohen raportet financiare të RTK-së.

Ndërkohë që, dy subjektet e tjera opozitare, Vetëvendosje dhe Nisma për Kosovën, e përkrahën krijimin e komisionit hetimor, duke e quajtur RTK-në si altoparlant të PDK-së dhe medium në shërbim të parapolitikës.

“RTK-ja, duhet ta themi të vërtetën, është altoparlant i PDK-së dhe për këtë është ankuar edhe vetë Mustafa. Pres nga LDK që, në përputhje me shqetësimet e kryeministrit të saj, ta përkrahë formimin e këtij komisioni hetimor”, tha Glauk Konjufca, VV.

“RTK nuk është ndonjë zbulim epokal, që po i shërben një politike të caktuar, por është shumë me rëndësi, që ne si Kuvend të kemi një qëndrimm të qartë rreth depolitizimit të RTK-së”, tha Zafir Berisha, “Nisma për Kosovën”.

“PDK mendon se duhet të konsumohen pikat për debat parlamentar dhe më pas të vendoset për komisionin”, tha Zenun Pajaziti, PDK.

“Une i bëj apel Kuvendit, që ne, si institucioni më i lartë ta ruajmë kredibilitetin tonë dhe në trajtimin e kësaj teme. Po të shkojmë në komision sot, e dimë që ka mandat 3 muaj dhe është nën menaxhimin e politikës”, tha Ali Sadriu, LDK.

Deputetët e kritikuan stafin menaxherial dhe bordin e RTK-së, se prej tre vitesh nuk i ka sjellë Kuvendit raportet financiare. Sipas ligjit, RTK ka statusin e institucionit të pavarur publik, me mision informues, edukues, kulturor dhe argëtues.

Kuvendi është themeluesi i RTK-së dhe, si i tillë, sipas ligjit duhet të mbrojë autonominë institucionale, duke siguruar financimin e duhur për realizimin e misionit. Pra RTK financohet nga buxheti i shtetit. Kuvendi po kështu zgjedh bordin e RTK-së, anëtarët e të cilit pastaj zgjedhin stafin menaxherial të transmetuesit publik.

Top Channel