Partia Demokratike akuzoi sërish këtë të shtunë qeverinë se ka braktisur
qytetarët, ndaj sipas sekretares për Marrëdhëniet me Publikun, Grida
Duma, ftesa për protestën e 12 marsit, bëhet akoma më e rëndësishme.
“Aktet e dëshpëruara të qytetarëve të braktisur nga qeveria, janë një akuzë e drejtpërdrejtë për Edi Ramën dhe Ilir Metën, të cilët janë përfshirë në luftën për pushtet, për influencë, për territore dhe para. Edi Rama dhe Ilir Meta e bandat e tyre, po u thonë çdo ditë qytetarëve se ata janë aty për axhendën personale, për të ndarë tendera, për të ndarë tortën e pushtetit, dhe nuk janë aty për të shërbyer. Partia Demokratike dhe qytetarët, do të jenë të enjten me 12 mars, e çdo ditë, aty ku duhet, në këmbë, në ballë të protestës, për ta ndalur të keqen. Kjo e keqe duhet shkulur nga rrënjët, përpara se të marrë jetë të tjera njerëzish”, tha Duma.
Të enjten e ardhshme, opozita ka paralajmëruar nisjen e protestave në vend. Vendimi është marrë në mbledhjen e kryesisë së Partisë Demokratike dhe drejtuesve të degëve të saj në rrethe.
Top Channel
