Deputeti që bëri publik deklaratat që trazuan politikën shqiptare, ka reaguar sërish në rrjetet sociale në përforcim të akuzës së tij ndaj Ilir Metës, duke i shtuar madje edhe një tjetër, vendosjen e eksplozivit ndaj ati që Tom Doshi e quan dëshmitari kyç.
Eksplozivin makinës së tij pak dite më parë Doshi thotë e kanë vënë bandat e Ilir Metës. Në një postim të gjatë në profilin e tij, Tom Doshi ngre pyetjen: përse institucionet nuk reaguan 6 muaj më parë kur ai kishte njoftuar për këtë tentativë Prokurorin e Përgjithshëm, Kryeministrin, Ministrin e Brendshem e madje dhe vetë Ilir Metën.
“Më quanin vëlla dhe mik, dhe më lanë të vritesha në pabesi”, shkruan Doshi.
Doshi nuk e konsideron shantazh ndaj Kryeministrit gjestet në parlament, por ajo që i thotë se ka kërkuar është mbrojtja e jetës së tij dhe familjes nga një krim që ai shton se po kërkon ta kryeje kryetari i parlamentit.
Tom Doshi thotë më tej se është takuar për këtë çështje me Kryeministrin në datën 30 gusht, të cilin e citon të ketë thënë: “Të ka shpëtuar Zoti Tomë! Çoje të penduarin tek Saimir Tahiri të bëj denoncimin dhe t’ja tregojmë vendin Metës”.
Deputeti i Shkodrës shkruan se e ka takuar të porositurin për krim me Ministrin Tahiri dhe është regjistruar dëshmia e tij, por ai ngre pikëpyetjen për mosveprimin dhe dyshimin se Ilir Meta i ka ofruar pazar.
Tom Doshi e paralelizon këtë situatë me atë të katër viteve më parë, kur Ilir Meta u akuzua për korrupsion dhe sipas tij ishte Sali Berisha që e shpëtoi nga burgu për të mos rrëzuar qeverinë.
“Ilir Meta sot e ka vënë Edi Ramën në të njëjtën pozitë kriminale”, thotë Doshi, për të cilin Kryeministri bëri zgjedhjen më të lehtë; mbrojti krimin për të mos i rënë qeveria.
Për deputetin e Shkodrës nëse Edi Rama do të kishte pranuar të shkonte në zgjedhje të parakohëshme ai do të kishte fituar.
“Populli e di që Rama i ka pasur krahët e lidhura nga LSI dhe bandat e tyre”, shkruan Doshi duke i bërë thirrje Ramës të distancohet nga ato që quan “kthetrat e Ilir Metës”.
Top Channel
