Adrian Çela mohon akuzat e opozitës: Nuk jam nën hetim

Partia Demokratike akuzoi një ditë më parë se në krye të OSHEE-së ishte emëruar një person nën hetim për korrupsion nga Prokuroria e Durrësit, gjatë kohës kur Çela ishte nënkryetar i Bashkisë së qytetit bregdetar.

Ndër të tjera, gjatë deklaratës së shkurtër për mediat, kreu i OSHEE-së bëri të ditur se formula e re e pagesës së faturave të prapambetura të energjisë ka nisur të aplikohet që prej ditës së enjte dhe numri i aktmarrëveshjeve është dyfishuar.

“Sot ka një fluks të papërballueshëm. Janë shtuar mbi 20 sportele në Tiranë, fluksi është i papërballueshëm. Ka afat, ai nuk mbaron sot. Ndaj ne do të punojmë edhe në fundjavë. OSHEE-ja do t’u përgjigjet kërkesave të klientit”, – u shpreh Çela.

Çela, ka sqaruar pozicionin e tij dhe tha se ndihet i qetë pas sulmeve të opozitës. “Jam i qetë dhe i ftohtë përballë këtyre sulmeve, – deklaroi kreu i ri i OSHEE-së në vend. – Gjithçka është politike, sepse unë jam i pastër. Kam deklaratën e Prokurorisë së Durrësit që nuk jam nën hetim dhe nuk kam asnjë çështje penale”.

Ndër të tjera, Çela ka theksuar se puna e tij në krye të OSHEE-së do të vazhdojë me përkushtim për të arritur objektivat e caktuara. “Dëmi i llogaritur sot është 150 milionë dollarë në vit dhe synimi ynë është ulja e shpenzimeve të shtetit dhe qeverisë në këtë sektor, pasi paratë e përfituara duhet të shpenzohen për shërbime publike”.

Çela zëvendësoi pak ditë më parë në këtë post Arben Seferin, i cili dha dorëheqjen për arsye personale.

Top Channel