Turqia bombardon bazat e kurdëve

Bëhet fjalë për sulmin e parë domethënës ndaj PKK-së, që kur grupi rebel shpalli armëpushimin në mars të vitit 2013.

E përditshmja “Hurriyet” njofton se sulmet ajrore të kryera natën e së hënës në afërsi të fshatit jug-lindor Daglica shkaktuan shumë viktima.

Aktualisht kurdët janë të acaruar me Turqinë për shkak të refuzimit të saj për t’i ndihmuar ata për mbrojtjen e qytetit të Kobanes nga militantët e Shtetit Islamik.

Gazeta të tjera turke shkruajnë se natën e së hënës ka pasur luftime mes rebelëve të PKK-së dhe trupave në Tunceli, në pjesën lindore të Turqisë, jo shumë larg kufirit.

Nga ana e saj ushtria turke deklaroi se sulmet ajrore në Daglica ishin një përgjigje ndaj një sulmi të Partisë së Punëtorëve të Kurdistanit kundër një postoblloku ushtarak në këtë zonë.

PKK e kishte sulmuar pikën ushtarake për tre ditë me radhë me armë të rënda automatike dhe raketa-hedhëse, raporton më tej e përditshmja “Hurriyet”.

Javën e kaluar protestat e kurdëve mbushën rrugët e provincave jug-lindore të Turqisë. Të paktën 31 persona mbetën të vrarë për shkak të përleshjeve me policinë. Shkak i protestave u bë politika pasive e Ankarasë ndaj luftimeve për qytetin Kobane.

Ushtria vendosi shtetrrethim në disa zona, por në disa prej tyre u verifikuan luftime mes mbështetësve të PKK-së dhe kurdëve islamikë që mbështesin Shtetin Islamik.

Top Channel