Ukrainë, sondazhet i japin fitore bllokut pro-Poroshenko

Poroshenko, i zgjedhur me një mazhorancë të theksuar votash Majin e kaluar, pas rrëzimit të paraardhësit të tij të mbështetur nga Moska, ka hedhur vështrimin nga zgjedhjet e fundmuajit për t’i dhënë më shumë legjitimitet rendit të ri pro-Perëndimor të Kievit, si dhe për të siguruar më shumë mbështetje ndaj planit të tij për paqe në rajonet lindore, duke i mbajtur ato ende nën kufirin ukrainas.

Sondazhi i bërë nga grupi “GfK”, sugjeron se blloku pro-Poroshenko mund të fitojë 29,9 përqind të votave, kundrejt 8,7 përqind të partisë së vendit të dytë, të ish-kryeministres Yulia Tymoshenko. Partia Radikale, e udhëhequr nga politikani popullor Oleh Lyashko, renditet e treta me rreth 7,6 përqind të votave.

Rezultatet e këtij sondazhi tregojnë se një Parlament tërësisht i ndryshëm pritet të krijohet pas 26 Tetorit, duke eklipsuar shumë figura të afërta me Viktor Yanukovichin pro-Moskës, të cilët kanë ruajtur vendet e tyre si deputetë pavarësisht rrëzimit të tij si President nga protestat kombëtare në rrugë.

Pas muajve të tërë trazirash, që kanë përfshirë edhe aneksimin e gadishullit të Krimesë nga ana e Rusisë, si dhe rebelimin e separatistëve në rajonet lindore të Donjeckut dhe Luhanskut, Partia e Rajoneve e Yanukovichit duket se është shuar praktikisht si një forcë politike. Shumica e anëtarëve të saj kanë kaluar me bllokun opozitar të ish-ministrit të Naftës, Yury Boiko, dhe partinë “Ukraina e Fortë” të ish-bankierit Serhiy Tigipko.

Sondazhi i “GfK”-së është bërë vetëm për gjysmën e Parlamentit 450 vendesh, për të cilat deputetët zgjidhen nga listat e partive, duke mos përfshirë 225 vendet që zgjidhen mbi bazën e kandidatit që merr më shumë vota se të tjerët (FPTP).

Top Channel