Liberia do të marrë një ilaç eksperimental të patestuar më parë, Zmapp, për të mjekuar njerëzit e prekur nga virusi Ebola.
Lëvizja vjen pas një kërkese drejtuar Shteteve të Bashkuara nga presidentja e Liberisë, Ellen Johnson Sirleaf, bëjnë të ditur mediat e huaja. Lajmi vjen në një kohë kur specialistët e mjekësisë po takohen në Gjenevë të Zvicrës për të eksploruar përdorimin e ilaçit të ri.
Organizata Botërore e Shëndetësisë, e cila ka organizuar takimin, deklaroi se të paktën 1.013 persona kanë vdekur nga Ebola në Afrikën Perëndimore.
Zyrtarë të qeverisë amerikane thanë ndërkohë, se roli i tyre ishte vendosja e kontakteve mes autoriteteve liberiane dhe prodhuesit të ilaçit Zmapp, Mapp Biopharmaceutical. Kompania nga ana e saj bëri të ditur se, medikamenti në fjalë u është dhënë autoriteteve liberiane pa asnjë kosto.
Zmapp është përdorur në Shtetet e Bashkuara ndaj dy punonjësve të ndihmës së shpejtë që kishin treguar shenja përmirësimi dhe ndaj një prifti katolik i prekur nga virusi në Liberi, i cili për fat të keq ka ndërruar jetë në një spital të Madridit.
Megjithatë, ai është testuar vetëm tek majmunët dhe ende nuk konsiderohet i sigurtë për njerëzit. Organizata Botërore e Shëndetësisë do të njoftojë rezultatet e takimit të jashtëzakonshëm mbi përdorimin e Zmapp më vonë gjatë së martës.
Top Channel
