Gaza, ndërmjetësuesit, kundër kohës

Izraeli ka bërë të ditur se është gati të pranojë shtyrjen për më tej të tij, pas bisedimeve mes delegatëve të Izraelit dhe palestinezëve në Kajro, me ndërmjetësimin e egjiptianëve, për dhënien fund të luftës, që thuajse ka shkatërruar tërësisht enklavën e kontrolluar nga Hamasi.

Palestinezët kërkojnë heqjen e bllokadës izraelito-egjiptiane në Gaza, si dhe lirimin e të burgosurve të mbajtur nga Izraeli. Krahu i armatosur i Hamasit tha se është gati të rinisë luftimet, për sa kohë që kërkesat e palestinezëve nuk janë përmbushur, ndërkohë që edhe Izraeli ka deklaruar se do t’i kundërpërgjigjej me forcë çdo lloj sulmi.

“Bisedime jo të drejtpërdrejta janë duke u zhvilluar dhe kemi ende kohë sot për të siguruar armëpushimin”, tha një zyrtar egjiptian, kur u pyet në lidhje me shtyrjen e paqes përtej orës 7 të mëngjesit të së premtes.

“Synimet e Egjiptit janë për të stabilizuar një paqe të gjatë, me marrëveshjen e të dy palëve, si dhe nisjen e negociatave për një marrëveshje të qendrueshme armëpushimi, në mënyrë që të ketë edhe lehtësira të kufizimeve ndërkufitare”.

Delegacioni palestinez u takua me zyrtarët e inteligjencës egjiptiane në orët e vona të së enjtes, ndërkohë që zyrtarë izraelitë thanë se të deleguarit e tyre do të rikthehen në Kajro pak orë më vonë, pasi u kthyen përkohësisht në Izrael për të informuar kryeministrin Netanyahu.

Edhe pas një muaji luftimesh të ashpra, palët “armike” ende nuk po flasin kokë më kokë me njëri-tjetrin.

Top Channel