Beteja e 78-vjeçarit me drejtësinë

Djali i tij Genci, 37 vjeç, nusja Florinda 35 vjeçe dhe vajza e çiftit, Jona 4 vjeçe, gjetën vdekjen nga një zjarr që ra në banesë mesnatën e 4 dhjetorit 2011, por për Mehmetin, ata mund të ishin shpëtuar nëse forcat zjarrfikëse do të kishin mbërritur në vendngjarje me pajisjet e duhura.

“Nuk kanë kyer detyrën, edhe duke thënë se ishin me uniformë. Nëse do kishin pasur uniformë do t’i kishin shpëtuar. Ato thërrisnin ‘ndihmë, po digjemi’, por ata nuk kanë hyrë se s’kishin uniformë të mbroheshin. Ata nxorrën vajzën 5 vjece, por gruas ndihma nuk i erdhi”, tregon Spahiu.

Një muaj pas fatkeqësisë, i moshuari iu drejtua prokurorisë që të hetonte punonjësit e zjarrfikëseve, që sipas tij nuk kishin kryer detyrën. Por prokuroria i pushoi hetimet dhe për këtë ai iu drejtua gjykatës, e cila urdhëroi organin e akuzës për hetime të mëtejshme.

Sërish prokuroria i pushon hetimet me arsyetimin se vepra e mosdhënies së ndihmës ishte amnistuar. Megjithatë, pas një procesi të dytë gjyqësor, i moshuari mori vendimin e dytë nga gjykata që detyronte prokurorinë të hetonte.

Për herën e tretë prokuroria e mbyll dosjen me argumentin se nuk ndodhemi para veprës penale të mosdhënies së ndihmës dhe as përpara shpërdorimit të detyrës e për këtë Mehmet Spahiu i është drejtuar sërish gjykatës.

“Kam 30 muaj, në familjen time ka ndodhur një tragjedi e madhe, kam humbur 3 pjesëtarë dhe kam një vajzë të vogël jetime. Vij në gjykatë për të zbardhur të vërtetën e ngjarjes. Prokuroria mbron zjarrfikësit, duke mos dashur të zbardhë të vërtetën e kësaj tragjedie. Të merren në pyetje zjarrfikësit. Ndërsa vitet kalojnë harrohet e vërteta. Ata thanë se kishin ardhur me uniformë, por po t’i kishin uniformat do t’i kishin shpëtuar”, thotë mes lotëve Spahiu.

E vetmja e mbijetuar e kësaj tragjedie është vajza e vogël e çiftit, Dea, e cila sot është pesë vjeçe.

Top Channel