Shpallen në kërkim 3 punonjës policie
09/07/2014 00:00
Tentuan të korruptojnë policinë për të shmangur ndëshkimin, në pranga dy shtetas 15/09 11:27
Gjykata e Rrethit Gjyqësor Tiranë, me kërkesë të Prokurorisë, ka vendosur masën e sigurimit personal “arrest me burg” ndaj 3 punonjësve të policisë, si dhe një punonjëseje të një agjencie doganore, bazuar në hetimet e kryera nga strukturat e hetimit të Drejtorisë së Përgjithshme të Shërbimit të Kontrollit të Brendshëm.
Vendimi është dhënë gjatë së mërkurës për personat Fatos Ahmati, Petrit Dauti dhe Behar Dida, të gjithë këta punonjës policie në postat kufitare të Shishtavecit dhe Morinës në Kukës, si dhe për punonjësen Afërdita Kraja, të agjencisë doganore “Çelmani” në qarkun e Tiranës.
Prokuroria e Tiranës ka regjistruar për këta persona procedim penal për veprën penale të “falsifikimit kompjuterik” dhe “ushtrim të ndikimit të paligjshëm ndaj personave që ushtrojnë funksione publike”.
Sipas hetimeve të SHKB-së dhe Prokurorisë, ka rezultuar se personat e mësipërm kanë kryer regjistrime fiktive të hyrje-daljeve në pikat e kalimit kufitar të Kukësit të disa mjeteve, në bashkëpunim me njëri-tjetrin dhe me qëllim përfitimi në mënyrë korruptive, e pas regjistrimeve fiktive kishin kryer veprimet e zhdoganimit.
Për këto veprime të kundraligjshme, punonjësit e policisë dhe punonjësja e agjencisë doganore kanë përfituar shumë të konsiderueshme parash. SHKB ka mundur të ekzekutojë urdhrin për masën “arrest me burg” për Afërdita Krajën, ndërkohë që tre punonjësit e policisë, Ahmati, Dida dhe Dauti janë shpallur në kërkim.
Top Channel
