Hetimet për ujësjellësin e Kukësit

Dy personat në fjalë, përkatësisht nga Tirana dhe Fieri, akuzohen për “vjedhje me anë të shpërdorimit të detyrës” dhe “shpërdorim të kontributeve të dhëna nga shteti në bashkëpunim”.

Sipas njoftimit të drejtorisë së policisë, këta shtetas kanë qenë përfaqësues ligjorë të firmave “ALBSTAR” dhe “GENER 2”, të cilat kanë kryer punimet për furnizimin me ujë të pijshëm të qytetit të Kukësit dhe 14 fshatrave.

Në njoftimin për shtyp thuhet se, nga verifikimet e bëra rezulton se punimet nuk janë realizuar sipas kontratës së nënshkruar në muajin korrik 2009, duke përfituar fondet e dhëna pa siguruar furnizimin me ujë të banorëve.

Historia e ujësjellësit të Kukësit nis me një premtim elektoral para vitit 2009, kur u bë edhe inaugurimi i nisjes së punimeve. Ujësjellësi i vjetër siguronte shumë pak orë furnizim me ujë të pijshëm.

Plot 3.5 milionë euro u shpenzuan për ndërtimin e ujësjellësit të ri të cilin bashkia refuzoi ta merrte në dorëzim për shkak se furnizimi me ujë ishte më keq se më parë, ndërsa kryebashkiaku Halili akuzonte se fondet ishin vjedhur dhe ujësjellësi ishte gjithë defekte.

Ai kërkoi edhe ndërhyrjen e Ministrisë së Transporteve dhe hetim nga ana e Kontrollit të Lartë të Shtetit, por asnjë prej institucioneve nuk ka publikuar përfundimin e ndonje verifikimi.

Të vetmit që reaguan ishin drejtuesit e Policisë së Shtetit, që një ditë më parë dërguan për ndjekje penale përfaqësuesit ligjorë të dy kompanive ndërtuese.

Top Channel