Tiranë, tregtarët kundër zhvendosjes

“Nga unë kërkojnë mbylljen e aktivitetit me arsyetimin se nuk është e izoluar dera. Kjo derë është, unë do kaloj me karrocë, si do ta shes mallin”, ankohet një tregtar.

Tregtarët në ish-uzinën Dinamo thonë se po përsëritet skenari i disa muajve më parë për largimin e tyre në tregun e ngritur në autostradë.

“Kjo është luftë për monopol në treg. Skenari është i tillë: duan të marrin bukën e kalamajve tanë. Segmentet e caktuara që duan të realizojnë një gjë të tillë ta dinë se do të përballen me protestat tona”, deklaron Teodhor Kristuli, kryetar i Unionit Tregtar Agro-Ushqimor.

Tregtarët pretdentojnë se kushtet higjeno-sanitare në këtë treg janë përmirësuar ndjeshëm, ndërkohë që sqarojnë se nuk ka asnjë subjekt që nuk disponon dokumentacionin e QKR-së.

“Në mënyrë të padrejtë apo për qëllime të klaneve të caktuara, ata dolën në konkluzionin se në këtë treg nuk plotësohen kushtet higjeno-sanitare. Janë bërë të gjitha, AKU-ja le të vijë të na kontrollojë. Ne do të na gjejë përpara dhe do të përballet me ligjin”, deklaron Alfred Bozhiqi, nga Shoqata e Mbrojtjes së Tregtarëve.

Një ditë më parë prefekti i Tiranës bëri publik ngritjen e një task force që do të mbajë nën kontroll tregun, ku dhe kërkoi marrjen e masave të ashpra ndëshkuese deri edhe në mbylljen e tij.

Për herë të parë kjo task forcë gjeti dhe mbështetjen e Bashkisë së Tiranës, e cila disa muaj më parë kërkoi largimin e tregtarëve dhe vendosjen e tyre në tregun e ngritur në autostradë.

Top Channel