Zbulohet “Lazarati” i Shkodrës
01/07/2014 00:00
Tentuan të korruptojnë policinë për të shmangur ndëshkimin, në pranga dy shtetas 15/09 11:27
Rreth 50 forca policie, 10 automjete dhe tre mjete lundruese kanë marrë pjesë në operacionin policor për asgjesimin e lëndëve narkotike. Aksioni është përqendruar në disa fshatra të thella të komunës Gur i Zi, që ndodhen buzë liqenit të Vaut të Dejës.
Kultivuesit e hashashit në këtë zonë një vit më parë kundërshtuan me armë policinë që kërkonte shkatërrimin e të mbjellave. Aty sërish është mbjellë drogë dhe parcelat janë zbuluar nga fotografimi nga ajri.
Lënda narkotike e gjetur dhe e asgjesuar sipas policisë rezulton të jetë në një tokë të shpyllëzuar pa pronar. Në kohën që policia po digjte lëndën narkotike është lajmëruar se një person po fshihej në zonën pyjore. Ai është arrestuar menjëherë si i dyshuar për kultivimin e drogës.
Qarku i Shkodrës ndër vite është rradhitur si një nga zonat më problematike sa i takon kultivimit të bimës narkotike kanabis sativa. Vetëm javën e fundit policia e Shkodrës ka arritur të asgjesojë në zonat e thella malore të këtij qarku rreth 6 mijë rrënjë.
Devoll, kapen 15 bimë opiumi
Drejtoria e Policisë së Korçës njofton se gjatë kontrolleve për gjetjen e
lëndëve narkotike të kultivuara është gjetur edhe opium. Kjo bimë është lëndë e parë për prodhimin e disa llojeve të drogës, kryesisht heroinën dhe mbillet gjerësisht në fushat e Afganistanit.
Por së fundmi policia ka gjetur 15 rrënjë të dyshuara si opium në fshatin Tren-Devoll. Për pasojë është arrestuar edhe shtetasi Raif Salami Xhaxhe, 56 vjeç, banues në fshatin Tren-Devoll.
Arrestimi i tij u bë pas kontrollit në ambjentet e jashtme dhe të brendshme të banesës së tij, ku veç bimëve të opiumit u gjetën e u bllokuan në cilësinë e provës materiale edhe 12 bimë narkotike të dyshuara si kanabis sativa.
Top Channel
