Hetimet për vrasjen e Santos

Pak orë pas krimit të rëndë, policia shoqëroi si të dyshuar në Fushë-Krujë, Klodian dhe Sajmir Gjozin, si dhe bllokuan një motor tip Suzuki në një servis në afërsi të fshatit Bubq. Motori i përngjante atij që ishte përdorur gjatë vrasjes ndaj policia kreu mbi të dyshuarit si edhe motorin ekspertizat e saj.

Në përfundim të ekspertizës, të cilën policia e publikoi, gjeti faktorë plotësues të qitjes me armë zjarri dhe gjeti gjurmë baruti në duart e të shoqëruarve. Pavarësisht se këta të fundit e mohojnë krimin, policia ka vazhduar me gjetjen e informacioneve shtesë për skedarët e tyre kriminalë të mëparshëm.

Nga shteti fqinj Greqia u informua se njëri prej tyre, Klodian Gjozi, ka vuajtur dënimin në burgjet greke për vrasje për shtatë vjet me radhë, nga 2004 deri më 2011-n. Sapo ka dalë nga burgu për kryerjen e kësaj vepre penale, ai sërish është prangosur nga policia greke, këtë radhë së bashku me vëllanë e tij për trafik droge.

Ai u kap në flagrancë duke shitur kokainë në zonen e Pagratit dhe Vironas në Athinë, por u lirua nga burgu sërish një vit më vonë. Policia dyshon se i arrestuari Klodian Gjozi, i cili më parë përdorte identitetin Dilaver Gjozi, është i rrezikshëm dhe dyshohet edhe për vjedhje me armë.

Ndërsa Suzuki i bllokuar që i përngjan motorit me të cilin u krye vrasja, rezulton të jetë denoncuar i vjedhur në janar të këtij viti në rajonin e Selanikut. Policia ende po punon për të gjetur motivet e vrasjes.

Deri më tani, pavarësisht se dyshimet janë të plota se në vrasje kanë qenë kushërinjtë Gjozi, ajo që mbetet mister është ende motivi.

Top Channel