Dëshmia e policit: Si i ndoqa vrasësit
28/06/2014 00:00
Tentuan të korruptojnë policinë për të shmangur ndëshkimin, në pranga dy shtetas 15/09 11:27
Hetimet për zbardhjen e ekzekutimit mafioz të Artan Santos në qendër të Tiranës dy ditë më parë vazhdojnë. Grupet hetimore të ngritura nga Policia e Shtetit dhe nga Prokuroria e Përgjithëshme janë ende në mbledhjen e informacioneve të nevojshme nga kamerat e sigurisë, por dhe nga dëshmitarët e shumtë që mund të çojnë në ngritjen e një piste për krimin.
Mes këtyre dëshimtarëve është edhe Tonin Qepuri, efektivi i Policisë së Tiranës që ndoqi dy autorët pas kryerjes së krimit. Në një intervistë dhënë për gazetën “Shqip” ai rrëfen se si autorët i kishin drejtuar pistoletën.
“Unë e di se si kam shpëtuar! Më ndihmoi Zoti dhe akoma nuk e kam marrë veten pas asaj që ndodhi. Ata më drejtuan armën dhe unë u shmanga për një moment!”, nis rrëfimin Qepuri.
Sipas Qepurit, motori i autorëve nuk ka qëndruar në zonën ku ai patrullonte më shumë se një minutë dhe si pasojë e kësaj, nuk ka pasur mundësi që të flasë me ta.
“Nuk kam folur me vrasësit. Nuk është i vërtetë një informacion i tillë. Vrasësit nuk kanë biseduar me askënd. As me viktimën, as me mua, e as me njeri tjetër. Ata kanë qenë me kaska dhe askush nuk i ka parë e askush nuk ka komunikuar me ta. E gjithë ngjarja ka qenë një fragment prej 60 sekondash. Aq ka qenë e gjitha. Ata kanë zbritur nga motori, kanë qëlluar dhe janë larguar. Kaq ka qenë e gjithë skena e krimit”, thotë ai.
Efektivi i policisë së Tiranës shton se gjithçka ndodhi shumë shpejt dhe për më tepër, ai ka qenë duke kryer punën në normalizimin e qarkullimit rrugor dhe nuk ka pasur kohë që të ndalojë apo komunikojë me asnjërën prej palëve, sepse ishte pak larg nga ajo që ndodhi.
Tonini tregon edhe se ka ndjekur vrasësit me motorin e policisë deri në nënkalimin e Liqenit të Thatë, ku më pas ata kanë humbur gjurmët.
“Unë i ndoqa me motor deri te Liqeni i Thatë. Aty tek zona e nënkalimit, m’u zhdukën. Më ikën nga sytë pastaj. Nuk arrita të kuptoj se çfarë drejtimi morën. Kontrollova në të gjithë zonën përreth, por nuk pashë asnjë lëvizje. Nuk di të them më se çfarë ndodhi më tutje”, shton ai.
Ndërkohë, të shtunën paradite Prokurori i Përgjithshëm Adriatik Llalla ka zhvilluar një takim me grupin e hetimor të posaçëm të ngritur për këtë çështje. Takimi është zhvilluar në zyrat e Prokurorisë së Përgjithshme dhe ka zgjatur për rreth 1 orë. Besohet se grupi hetimor ka njohur kryeprokurorin me ecurinë e hetimeve dhe me pistat e mundshme të krimit.
Pak pas takimit me grupin hetimor, kryeprokurori Llalla zhvilloi një takim me kreun e Shërbimit Informativ Shtetëror, Visho Ajazi Lika. Një ditë më parë, kreu i SHISH deklaroi se institucioni që ai drejton nuk kishte asnjë informacion për kërcënime ndaj të ndjerit Artan Santo.
Artan Santo u ekzekutua rreth orës 09:15 të paradites së enjte në zonën e
ish-Bllokut në Tiranë, poshtë zyrave të bankës që ai kishte themeluar dhe drejtonte prej kohësh.
Top Channel
