Çipa tregon itinerarin e vrasësve

“Pas ngjarjes vrasësit përshkuan me motor rrugën “Ibrahim Rugova. Ata u
ndoqën nga një polic me motor që ishte pranë vendit të ngjarjes.
Ndërkohë, u mbyllën pikat kaluese dhe u bllokuan rrugët. Por mjeti i
vrasësve humbi gjurmët tek Komuna e Parisit. Ata dolën nga Tirana përmes
një rruge dytësore dhe u drejtuan për në Fushë Krujë. Në këtë zonë
mjeti u konstatua nga një tjetër patrullë që e ndoqi deri në Urën e
Gjoles, por edhe aty ata humbën gjurmët”, ka deklaruar Çipa.

Zyrtari i lartë i policisë ka bërë të ditur se për identifikimin dhe
kapjen eventuale të vrasësve është ngritur një grup hetimor, që po
analizon me imtësi provat e mbledhura në terren dhe ato nga kamerat e
sigurisë që kanë filmuar vrasësit.

“Është ngritur një grup hetimor që ka mbledhur provat në vendngjarje.
Gjithashtu janë kryer kontrolle në Krujë e Lezhë, të cilat vijojnë edhe
aktualisht. Janë kontrolluar kamerat e sigurisë nga Ura e Gjolës e deri
në rrugën e Mamurrasit. Grupi hetimor po heton me intensitet”, ka bërë
të ditur Çipa.

Ndonëse në deklaratën e tij nuk ka pasur asnjë risi, përballë pyetjeve
të gazetarëve Çipa ka insistuar se nga ana e forcave të rendit nuk ka
pasur asnjë neglizhencë.

Gjatë fjalës së tij, shefi i policisë së kryeqytetit largimin e vrasësve
dhe humbjen e gjurmëve të tyre ia ka atribuuar profesionalitetit të dy
atentatorëve, që sipas tij e kishin organizuar vrasjen në përsosmëri.

“Shkaqet e moskapjes së autorëve nuk kanë të bëjnë me angazhimin e
policisë, sepse ai ka qenë maksimal, por vrasja ka qenë e mirëorganizuar
dhe autorët kanë qenë profesionistë. Gjithashtu, zoti Santo nuk ka
pasur asnjë problem dhe nuk kemi pasur arsye për ta mbikëqyrur”, ka
shtuar Çipa. 

Llalla takohet me kreun e SHISH

Hetimi dhe zbardhja e atentatit mafioz të bankierit Artan Santo ka bërë
bashkë në një takim të beftë gjatë të shtunës, Prokurorin e
Përgjithshëm, Adriatik Llalla dhe kreun e Shërbimit Informativ
Shtetëror, Visho Ajazi Lika.

Të dy zyrtarët e lartë kanë zhvilluar një takim kokë më kokë për rreth një orë në zyrën e Prokurorit të Përgjithshëm Llalla.  Burimet shprehën në rrugë jo zyrtare se kreu i Shërbimit Informativ Shtetëror i ka dorëzuar numrit një  të akuzës informacione të vlefshme dhe me interes për hetimin, por pa specifikuar se për çfarë të dhënash bëhet fjalë.

Për zbulimin e vrasësve dhe porositësve të ekzekutimit të të ndjerit Artan Santo, mesditën e së premtes autoriteteve shqiptare u është ofruar asistencë hetimore  edhe nga partnerët ndërkombëtare, jo vetëm për ekspertë, por edhe për pajisje të specializuara.

Pas sekuestrimit të pamjeve filmike nga dhjetëra kamera të sigurisë jo vetëm të institucioneve, por edhe të bizneseve private, policia ende vijon me kontrollet, shoqërimet dhe gjetjen e dëshmitarëve, ndërkohë për çdo informacion të vlefshëm që do të hidhte dritë mbi ngjarjen, në dispozicion të qytetarëve janë numrat 0694100003 dhe numri pa pagesë 129.

Mes veprimeve të shumta që po kryhen, Prokurori i Përgjithshëm në orën nëntë të së shtunës thirri në takim katër prokurorët që po merren me hetimet për vrasjen e bankierit Santo.

Takimi u zhvillua për rreth një orë në Prokurorinë e Tiranes mes Prokurorit të Përgjithshëm Llalla, Kryeprokurorit të Rrethit, Petrit Fusha dhe prokurorëve Arben Nela, Dritan Nushi dhe Adriatik Çami.

Nën përpjekjet e saj për të rënë në gjurmët e autorëve të këtij krimi të rëndë, Prokuroria e Përgjithshme i ka bashkangjitur grupit të hetimit edhe një Prokuror të Njësisë Task Force.

Ndini Tavani mësohet në rrugë jo zyrtare se do të verifikojë veprimtarinë e bankës, ku i ndjeri Santo ishte Drejtor i Përgjithshëm i saj, në vijim të disa pistave të ngritura, mes tyre edhe ajo e dyshimeve për veprimet bankare të kryera kohët e fundit.

Zgjidhet pasuesi i Artan Santos
Maltin Korkuti do të drejtojë bankën “Credins”

Këshilli drejtues i bankës “Credins” ka emëruar Maltin Korkutin në postin e Drejtorit të Përgjithshëm të kësaj banke.

Përmes një njoftimi zyrtar, Këshilli bën të ditur se në zbatim të Statutit dhe kuadrit rregullativ në fuqi, si dhe në vijim të veprimtarisë për të garantuar dhe siguruar vazhdimësinë e veprimtarisë normale të bankës, mori vendimin e zgjedhjes së Korkuti në pozicionin e Drejtorit të Përgjithshëm, që mbahej nga i ndjeri Artan Santo.

Bashkëthemeleus në krijimin e Credins dhe njëkohësisht aksioner, Korkuti ka mbajtur deri më tani pozicionin e zv.drejtorit të Përgjithshëm në këtë bankë si dhe anëtar i Bordit Drejtues të saj.

Përmes njoftimit, “Credins” informon publikun dhe të gjithë klientët se veprimtaria e Bankës vazhdon normalisht në të gjitha degët e saj. 

Top Channel