Ukrainë, betejë për kontrollin e Donetskut

Shkëmbime të dhunshme zjarri janë regjistruar dhe tym është parë të ngrihet nga zona ku ndodhet aeroporti.

Rebelët pro rusë bastisën aeroportin “Sergei Prokofiev” të Donetskut ditën e hënë, pasi u bë e qartë se biznesmeni Petro Poroshenko po shkonte drejt fitores në zgjedhjet e së dielës.

Avionë ushtarakë kanë qarkulluar përreth aeroportit, ndërsa helikopterët luftarakë kanë qëlluar raketa ndaj ndërtesës. Për momentin nuk ka raportime për viktima.

Qeveria e përkohshme e Ukrainës është e angazhuar në një ofensivë konkrete në lindje të vendit për të shtypur kryengritjet e rebelëve pro-rusë, që deri tani ka shkaktuar shumë viktima.

Nga ana e tyre, pro-rusët penguan me dhunë votimin në Donetsk një ditë më parë, duke bërë që asnjë qendër votimit të mos hapej në qytet dhe në mbarë rajonin.

Luftimet vijnë pasi fitorja e zotit Poroshenko është konfirmuar dhe ai pritet të marrë detyrën si presidenti i ri i Ukrainës. Ai ka shprehur gatishmërinë e tij për të biseduar me Rusinë për zgjidhjen e situatës.

Nga ana tjetër, edhe ministri i Jashtëm rus Sergei Lavrov ka thënë se Moska është gjithashtu e gatshme për bisedime, por sulmet ndaj pro-rusëve në Ukrainë duhet të marrin fund.

Top Channel