Danimarka, drejt OK-it për statusin
26/05/2014 00:00
Meta nuk i ndal fyerjet ndaj kreut të SPAK: Nuk i druhem një prokurori që i dridhet goja e s’di të lidhë dy fjalë 23/04 18:41
Danimarka duket se do të shkojë drejt një vote pro për statusin kandidat të Shqipërisë më 27 qershor. Të paktën të tilla duken sinjalet e këtij vendi, një prej pesë shteteve që hezituan vendimmarrjen në Këshillin e BE-së në dhjetor.
Ministri i Jashtëm Ditmir Bushati përfundoi vizitën në Kopenhagen, ku takimin e parë e pati me homologun danez Martin Lidegaard, takim që përkon me 44-vjetorin e vendosjes së marrëdhënieve diplomatike dypalëshe.
Ministri Lidegaard siguroi homologun shqiptar për mbështetjen e vazhdueshme të Danimarkës në procesin e integrimit të Shqipërisë në Bashkimin Evropian.
Kjo, pasi shefi i diplomacisë shqiptare nënvizoi se integrimi i Shqipërisë në BE mbetet një prioritet madhor që gëzon një mbështetje të gjerë nga shqiptarët dhe nga i gjithë spektri politik.
Lidergaard dhe Bushati ndanë së bashku mendimin se qeveria shqiptare ka dhënë dëshmi të qarta të vullnetit dhe angazhimit për përmbushjen e detyrimeve për marrjen e statusit të vendit kandidat, veçanërisht në luftën kundër krimit të organizuar dhe korrupsionit. “Mbetem shpresëplotë tek mbështetja daneze në vendimin e qershorit”, deklaroi Bushati.
Ashtu si edhe në takime të tjera me homologët perëndimorë, Bushati mori vlerësimin maksimal për qëndrimin dhe reagimin në krizën ukrainase të Shqipërisë, që deri tani mbetet i vetmi vend në rajon i pozicionuar qartazi. Dy homologët janë ndalur edhe tek tema e ditës sot për Europën, zgjedhjet për Parlamentin Europian.
Rritja e përfaqësimit të euroskeptikëve në PE, e veçanërisht ekstremistët e së djathtës në Francë, janë komentuar me shqetësim në kontinetin e vjetër, ndërsa për vendet aspirante në BE, ku bën pjesë edhe Shqipëria, shqetësimi për rritjen e forcave anti-zgjerim është edhe më konkret.
Top Channel
