Durrës, plagosen me thika 4 të rinj

Hagi dhe Isnado Domi, përkatësisht 15 dhe 18 vjeç nga Shkozeti, nxënës të shkollës së mesme sportive “Benardia Qeraxhia”, si dhe 17-vjeçari me iniciale Dh.K. nga Durrësi, i dënuar më parë për plagosje, janë arrestuar në flagrancë pasi dyshohet se në bashkëpunim me njëri-tjetrin kanë shkaktuar plagosjen e 4 vetëve.

Ngjarja ndodhi pranë bllokut të shkollave të mesme dhe Drejtorisë Arsimore të Durrësit. Një sherr banal mes të rinjsh përfundoi me përdorim armësh të ftohta dhe si rezultat mbeti i plagosur rëndë një 16-vjeçar nga fshati Sallmone, nxënës i shkollës së mesme profesionale “Beqir Cela” në Shkozet, si dhe tre të rinj të tjerë të moshës 19-21 vjeç nga Durrësi dhe fshati Xhafzotaj, që u përfshinë në konflikt.

I plagosuri rëndë, nxënësi 16-vjeçar, i është nënshtruar një ndërhyrjeje kirurgjike dhe ndodhet në reanimacionin e spitalit të Durrësit, jashtë rrezikut për jetën.

Lidhur me ngjarjen u shoqëruan 7 persona dhe me zbardhjen e rrethanave të saj 3 prej tyre u vunë para përgjegjësisë penale dhe u arrestuan.

Në cilësinë e provës materiale janë sekuestruar dy thikat me të cilat është kryer vepra penale, si dhe një motoçikletë me të cilën kanë lëvizur autorët e dyshuar.

Top Channel