Venezuelë, Maduro: Mbi 50 viktima

Shifrat zyrtare flasin për 13 persona të vrarë gjatë përplasjeve, ndërkohë që Maduro akuzon për dhunën grupet fashiste.

Ai foli përpara një takimi, i cili synon t’i japë fund trazirave, të shkaktuara nga inflacioni i lartë, krimi i shfrenuar dhe mungesa e ushqimit. Por, koalicioni kryesor opozitar refuzon të marrë pjesë, duke e quajtur atë një farsë.

“Nuk do të ulemi në një dialog mashtrimi, që do të përfundojë në tallje për bashkëkombasit tanë”, tha për reporterët zëvendës-presidenti i bllokut, Jorge Arreaza.

Të hënën, Prokurorja e Përgjithshme e Venezuelës, Luisa Ortega, tha se 13 persona kishin vdekur gjatë dhunës së lidhur me protestat. Në atë kohë, grupet e opozitës thoshin se numri i viktimave ishte të paktën 15.

Duke folur përpara një tubimi pro-qeveritar të fermerëve jashtë pallatit presidencial, Maduro tha se “ka mbi 50 të vdekur si pasojë e bllokimit të rrugëve dhe barrikadave të ngritura”.

“Dje, një zonjë 84-vjeçare vdiq në lindje të Karakasit, sepse ngeci nëpër rrugët e bllokuara për 3 orë, teksa ndërroi jetë në makinën e familjes së saj për shkak të një ataku kardiak”, tha ai.

Ai nuk sqaroi më tej arsyet se përse e ka rritur kaq shumë numrin e viktimave. Gjithsesi, kudo në Karakas janë mbledhur me qindra njerëz, kryesisht femra, të udhëhequra nga gruaja e liderit të burgosur të opozitës, Leopoldo Lopez, të cilat protestojnë kundër arrestimit nga qeveria të demonstruesve.

Top Channel