Krimea, zaptohet godina e qeverisë

Flamuri rus është ngritur në dy ndërtesat në kryeqytetin Simferopol dhe autoritetet nuk kanë bërë ende ndonjë deklaratë lidhur me situatën.

Marrja nën kontroll e ndërtesave vjen një ditë pas përballjeve mes separatistëve pro-rusë dhe mbështetësve të liderëve të rinj të Ukrainës.

Ministri i Brendshëm ukrainas, Arsen Avakov deklaroi se zona në Simferopol është rrethuar nga forca policie për të shmangur gjakderdhjen dhe tha se uzurpimi i ndërtesave është një akt “provokues”.

“Janë marrë masa për të frenuar veprimet e ekstremistëve dhe për të mos lejuar që situata të përshkallëzohet në një përballje të armatosur në qendër të qytetit”, deklaroi Avakov në profilin e tij në rrjetin social Facebook.

Personat që kanë rrethuar ndërtesat nuk kanë bërë ndonjë kërkesë apo ndonjë deklaratë, por u vendosën atje duke thënë se “Krimea është Rusi”. Agjencia e lajmeve “Associated Press” raportoi se trupat hodhën një granatë shurdhuese kur u pyetën nga gazetarët. 

Yanukovych: Jam ende president
Rusia i siguron mbrojtje personale liderit të rrëzuar

Viktor Yanukovych vazhdon ta konsiderojë veten udhëheqësin legjitim të Ukrainës. Përmes një deklarate të publikuar të enjten në agjensine e lajmeve ruse, ai i kërkon Moskës të garantojë sigurinë e tij përballë veprimeve të ekstremistëve që morën pushtetin në Ukrainë.

“Në rrugët e shumë qyteteve të vendit tonë ekstremizmi lulëzon. Kundër meje dhe bashkëpunëtorëve të mi janë bërë kërcënime fizike. Jam i detyruar t’u kërkoj autoriteteve ruse të më garantojnë sigurinë personale”, ka thënë Yanukovych.

Vendndodhja e Viktor Yanukovych mbetet e panjohur, megjithëse gazeta “Kathimerini” raportoi të mërkurën se “ai ishte arratisur dhe strehuar në Greqi, në manastirët e Malit Athos, në zonën e Halkidhikisë”.

Ndërkohë, Moska zyrtare ka njoftuar se do t’i garantojë atij mbrojtje në territorin e federatës ruse. Njoftimi është bërë nga një burim pranë pushtetit, të cilit i referohet agjencia shtetërore e lajmeve “Itar-Tass”.

“Duke qenë se presidenti Yanukovych i është drejtuar autoriteteve të Federatës Ruse duke kërkuar mbrojtje për sigurinë personale, kjo kërkesë është plotësuar në territorin e Federatës Ruse”, ka sqaruar burimi. 

Top Channel