Ashpërsimi i gjuhës politike në vend

Ndonëse diçka e tillë nuk ndodhi këtë të enjte, me Partinë Demokratike që mori pjesë në punimet e Kuvendit, një seri batutash dhe kundërbatutash, një seri akuzash, vërshëllimash apo goditje të tavolinave nga ligjvënësit demokratë për të protestuar ndaj qëndrimit të qeverisë, sollën një ashpërsim të menjëhershëm të debatit politik në vend.

Për të biseduar për të gjitha këto, Sokol Balla ftoi në emisionin e tij në “Top-Story” përfaqësues të të dy forcave politike dhe analistë të pavarur, si nënkryetarin e Partisë Demokratike, Eduard Halimi, Sekretarin e Çështjeve Organizative të Partisë Socialiste, Blendi Klosi dhe analistët Mustafa Nano e Alfred Lela, kryeredaktor i “MAPO”-s.

Duke nisur bisedën në studio, zoti Halimi rreshtoi të gjithë arsyet që kanë çuar opozitën që të kalojë në këto qëndrime të ashpra. “Nuk ka pasur një vendim për bojkotin, por një qëndrim koherent për qëndrimet me Parlamentin. Qëndrimi ynë ndaj shkarkimit të ILDKP-s është vetëm një episod i fundit ndaj, për të bërë analizën e sotme duhen analizuar të gjithë episodet që kur kemi kaluar në opozitë. Episodet e para, janë tre çështje në tryezën e politikës sot, janë çështje që kanë të bëjnë thelbësisht me integrimin, shteti ligjor, administratën dhe demokracinë parlamentare”, tha Halimi.

“Këto nuk janë çështje të axhendës së PS, por kushte të kërkuara nga BE në procesin e integrimit. Të tre këto çështje kanë pësuar në këto gjashtë muaj një regres të dukshëm. Që nga dita e parë e mazhorancës, kryeministri kishte si synim agresivietin dhe ashpërsimin ndaj opozitës, ashpërsimin e gjurmës politike në institucionet e pavarura dhe agresivitetin ndaj pronave të paluajtshme të shtetasve shqiptarë. Opozita nuk mund të bëhej palë. Në 28 Shtator, Rama firmosi natën reformën kryesore dhe kryeministri vendosi me një akt që të prishte pronat e ligjshme të shtetasve shqiptare, duke mos i lënë asnjë hapësirë opozitës dhe vetë Rama në mënyrë të përhershme ka sulmuar institucionet e pavarura. Në moment kur s’të lënë asnjë rrugdalje, atëherë qëndrimi ynë është të thërrasim popullin”.

“Nëse kryeministri si jep mundësi opozitës të mbrojë administratën, pronat e ligjshme, nuk ka rrugë tjetër”, vazhdoi ish-ministri i Drejtësisë, Halimi. “Bojkoti mund të ishte një rrugë e thjeshtë, ndonëse mund të ketë një sensibilizim më të madh të ndërkombëtarëve dhe qytetarëve, por për të analizuar këtë çështje, opozita e ka analizuar me gjakftohtësi dhe analiza ka nisur se përse kryeministrit i intereson të provokojë opozitën, pasi shkarkimi i kreut të ILDKP-së është hapja e një konflikti, pasi institucionet e pavarura janë për të kontrolluar pasuritë e pushtetarëve, në mënyrë që të mos kemi pasuri të paligjshme dhe 20% e famshme. Por, nëse në kundërshtim me ligjin dhe kushtetutën nuk i lihet opozitës asnjë hapësirë, cfarë duhet të bëjmë? i gjithë konflikti vjen nga një qëndrim permanent i kryeministrit që s’ka të bëjë vetëm me opozitën, por edhe me çështjen që ka të bëjë me integrimin. Dje në opozitë, kryeministri ashpërsonte qëndrimin ndaj mazhorancës, sot të kundërtën, me qëllim të vetëm që të ndërpresë rrugën e integrimit pasi nuk i intereson të jetë nën mbikqyrjen e familjes europiane”, konstatoi Halimi.

Në marrjen e fjalës, Klosi përligji si të ligjshëm një vendim të mundshëm të opozitës për të bojkotuar Parlamentin, por vendosi pikëpyetje mbi ato që Partia Demokratike i quan si kauza që po përpiqet të mbrojë. “Kam qenë pjesë e bojkotit parlamentar të Partisë Socialiste dhe s’mund të them që kjo nuk është e drejtë e kësaj force poltiike, por ju thatë që ne kemi 86 vota dhe mund të bëjmë si të duam. Sot, në Parlament Berisha thonte ka 5 mijë apo 150 mijë veta në rrugë. Opozita nuk është çështje numrash, por çështje kauze, për çfarë duhet të protestojë? E ndoqa me vëmendje Halimin dhe krerët e lartë të PD-së dhe argumentat janë këto që përmendi zoti Halimi”.

“Le t’i marrim me radhë a janë këto kauzat për bojkot apo manifestime në rrugë”, vazhdoi argumentimin e tij zoti Klosi. “Kauza kush është? Raporti që kanë ata me të shkuarën, kërkojnë ato standarte të shkëlqyera, por qytetarët shqiptarë kërkojnë ndryshim. Thonë që larguan administratën, por të larguarit dolën sot, ata që u larguan nga PD në 2005-n dhe kanë fituar vendime të gjykatave për t’u rikthyer në punë. Po të shohësh shifrat, në një vit të opozitës 2005-06 u larguan 14 mijë veta nga administrata e lartë, sot janë larguar 240 veta, 60 prej tyre janë ripunësuar në vende të tjera pune dhe shumë pak prej tyre janë larguar me problematikat e ristrukturimeve, të tjerët janë me shkelje. Në qoftë se opozita del në rrugë për të mbrojtur krerët e institucioneve që kanë drejtuar kaq keq, kjo nuk është kauzë për të marrë popullin, siç nuk shtë kauzë prishja e pallatit komplet në shkelje të ligjit të Lul Bashës”.

“Opinioni publik e pranon atë si vendim dhe kjo nuk mund të jetë kauzë për të mbrojtur dhe nxjerrë njerëzit në rrugë”, shtoi Klosi. “Largimi i Zana Xhukës është kauzë? Largimi i drejtuesve të pavarura, por a mund të flasim në Shqipëri që gjatë 8 viteve të ketë qoftë edhe një institucion kushtetues të pavarur që nuk u vendos me konsensus të mazhorancës, por me konsensus personal të Berishës, Topallit dhe krerëve të lartë të Partisë Demokratike. Zonja Xhuka, për 5 vjet më ka kërkuar kontrollin e pasurisë, por s’ka rëndësi, në fund për mua s’ka pasur asnjë shqetësim në këtë aspekt, por a mund të quhet institucion ILDKP i pavarur? Duke nisur nga presidenti i tanishëm apo në 2007-n kur u vodhën hapur votat në Parlament për presidentin e asaj kohe? Ka pasur aq shumë përpjekje për të bërë një president konsensual dhe një presion ndërkombëtar dhe u vu një funksionar super i lartë i PD. Super besniku i Berishës dhe sot jemi ende tek ky superbesnik dhe për kreun e ILDKP-së u votuan pikërisht dy emrat e propozuar prej Nishanit. Ku është uzurpimi i institucioneve këtu? Ndaj ne nuk gjejmë kauzë, nuk është çështje kauzash apo numrash. Mund të gjejmë argument, por e vetmja kauzë është prishja e rehatisë, e ndaj kanë vendosur që ta çojnë situatën në Shqipëri në konflikt të vazhdueshëm”.

Në argumentimin e tij, zoti Mustafa Nano tha: “Nga pretendimet e opozitës janë dy gjëra që më duket mua se qëndrojnë, të paktën në kompetencën time. Ka një problem me shkarkimin e Xhukës dhe ka pasur edhe një problem me ligjin e nëpunësit civil që pas botimit të ligjit në fletoren zyrtare më duket i zgjidhur. Pastaj, pretendimet e tjera me thënë të drejtën nuk e di, zakonisht ka një kauzë proteste dhe në ballë të kësaj kauze organizohen protestat. Lidhur me jetën parlamentare po krijohet një precedent i mirë, për herë të parë në 23 vjet kemi një spiker që respekton në maksimum opozitën, mund të ketë vend për qortime, një rast dhe një rast tjetër, por ne e krahasojmë me atë që ka qenë. Jeta parlamentare në 8 vitet e shkuara ka qenë një shëmtirë e gjallë, edhe për shkak të spikeres që ka qenë dhe këtë njerëzit e shohin pasi e kanë të lehtë të bëjnë krahasimin.  Shqetësimi është i drejtë për Xhukën, por ju thoni po shkatërrohet administrata, por cila? 3-4 muaj para zgjedhjeve, kur iku LSI nga koaliconi, me mijëra vetë dhe këtë e dimë të githë janë hequr nga puna. Një pjesë ikën vetë dhe u zëvendësuan brenda 3 muajve, e kjo është administrata që po shkatërrohet? Pastaj jam kundër pohimive që s’kanë lidhje. Halimi thotë që Rama nuk do që Shqipëria të jetë me BE, përse se do? Hiqeni këtë që nuk e do Shqipërinë, përse nuk e dashka?”.

Për Alfred Lelën, mazhoranca e tanishme vazhdon të vuajë nga një sindromë, e krahasimit të veprimeve të saj të tanishme me atë që ndodhte më parë në qeveri. “Në pjesën e parë të fjalës më bëri përshtypje diçka nga ajo që tha zoti Klosi, tha që duhet një koalicion i madh për integrimin, një bashkëveprim midis PD dhe PS. Unë kam përshtypjen dhe është një fakt që PD, opozita e drejtuar prej saj e ka dhënë dhe e ka bërë këtë akt mbështetjen, me rezolutën e paraqitur në Parlament, duke treguar një shenjë proeuropianizmi më të fortë dhe në kundërshtim me atë që opozita e djeshme, pjesë e të cilës ka qenë edhe Klosi, ka bërë me një konsensus të padhënë. E dyta, vihet re një përpjekje nga mazhoranca për ta kaluar bisedën në dje dhe sot, çbënë ata po bëjmë edhe ne, ndërsa mazhoranca me termin iluminist “Rilindje” iu besua pushteti që sot të bëjë më mirë dhe ndryshe nga ata që ishin dje, sepse mua më mjafton formulimi i tyre sikur të mos i gjykoja fare aksionet e tyre, kjo lloj mbrojtje është pavetëdija e tyre që po ekspozon atë që kanë bërë, fakti që kështu keni bërë dhe ju është një sindromë nga e cila mazhoranca duhet të dalë për hir të votave që ka marrë”.

Në nisje të pjesës së dytë të Top Story, Sekretari Organizativ i Partisë Socialiste, Blendi Klosi tha se sjellja e opozitës është një skenar trazirash, i njëjtë si në vitin 1997-1998 dhe sërish, sipas tij, organizuar nga Sali Berisha.

“Qytetarët sot nuk u shkojnë më pas. Po cfarë ndodh? Është skenari i njëjtë si ajo që ndodhi në 1997-1998 kur Sali Berisha la parlamentin dhe nisi protestat e përditëshme. Gjuha që vjen dhe skenari i paraqitur është e njëjta, acarim dhe vetëm acarim të situatës për të fituar e keqja. Ne po përpiqemi të ndryshojmë lidershipin, është momenti që të mos kemi më filozofinë e Sali Berishës ku futet fjalori i keq në parlament, armët dhe protestat e dhunshme, njësoj si në vitin 1998”, tha zoti Klosi.

Kryeredaktori i MAPO-s, Alfred Lela u ndal tek ajo që ai e quajti një situatë “parehatie sociale”, duke përmendur sipas tij aktet e shpeshta të shpërthimeve me tritol, vrasjet dhe aksidentet. Por Blendi Klosi tha se cështjet e sigurisë lidhen edhe me zhvillimet ekonomike. “Për fat të keq Shqipëria nuk është në një moment të mirë ekonomik. Votat e 23 qershorit ishin vota ndryshimi dhe ne e kërkuam me forcë ndryshimin, që është duke ardhur. Ne e dimë shumë mirë që ky vend bëhet vetëm po pati ekonomi të mirë, lulëzim ekonomik”, tha ai.

Analisti Mustafa Nano lidhur me atë që disa e cilësojnë si një moment joefikas i maxhorancës së majtë, pavarësisht numrave të shumtë që ka në Kuvend, argumentoi se ky moment lidhet me funksionimin e demokracisë, që ka disa kosto. “Demokracia herë pas herë ka momente joefikase sepse vendimet e mëdha merren në respekt të institucioneve dhe të palës tjetër, por ndonjëherë mungon konsensusi. Në rrethana të tilla duhet të privilegjohet respekti ndaj ligjit dhe institucioneve dhe unë jam gati të pres vetëm që ligjet në këtë vend të zbatohen”, tha ai.

Gjuha e ashpër në Kuvend u rikthye në qendër të debatit në panel. Protagonisti kryesor në seancën e së enjtes ishte padyshim ish-kryeministri Sali Berisha. Pas zgjedhjeve të 23 qershori ai deklaroi tërheqjen nga posti i kryetarit dhe ai i komisioneve, por sot shihet më aktiv se kurrë dhe mos ndoshta edhe përcaktues në vendimet e kryetarit të Partisë Demokratike.

Mustafa Nano tha: Pas 23 qershorit jam përpjekur të flas sa më pak për Berishën, për mua është i sëmurë. Sigurisht që është aktor politik shumë i rëndësishë, por tani është një problem i Partisë Demokratike, jo problem i vendit, Problem i opozitës.

Alfred Lela: Nuk kam parë në asnjë moment ndërhyrje të zotit Berisha aty ku nuk duhej të kishte. Protesta e fundit e tregoi këtë që nuk pati asnjë ndërhyrje të zotit Berisha që i prishi itinerarin zotit Basha, në asnjë moment. Kush e thotë këtë gënjen veten dhe pak vetë që do ta besonin këtë.

Eduard Halimi shtoi: Nuk besoj që ka apo do të ketë zyrtarë të këtij vendi që të punojë sa ka punuar zoti Berisha. Edhe sot nuk ka asnjë deputet që të punojë sa Sali Berisha. Një njeri që ka të gjithë aftësinë, për të mos thënë më i miri në politikën shqiptare. Të gjithë përpiqen që të marrin sa më shumë nga përvoja e Sali Berishës, përfshirë këtu edhe kryetarin Lulzim Basha. Është aset pozitiv për opozitën.

Blendi Klosi: Basha kontrollohet nga Berisha përsa kohë që është emëruar në atë post, nuk është zgjedhur nga zgjedhje të lira. Për ne është po ai Sali, po ajo gjuhë, po ai skenar. Ne e marrim me shaka, por nuk është për t’u marrë me shaka sepse kemi të bëjmë me mënyrën e të bërit opozitë.  

Top Channel