Itali, Renzi votëbesohet në Senat

Përveç ndryshimeve të planifikuara në ligjin për zgjedhjet, shkurtimin e taksave dhe investimin në vende të reja pune, ai tha se dëshiron të shfuqizojë Senatin, si një organ ligjvënës.

Në orët e para të së martës, koalicioni i tij i gjerë fitoi votëbesimin në Senat, me 169 vota pro dhe 139 kundër. Ndërkohë, më vonë gjatë së martës, atij do t’i duhet të fitojë votëbesimin edhe në Dhomën e Ulët të Parlamentit, ku partia e tij e qendrës së majtë ka një mazhorancë të fortë.

Lideri i Partisë Demokratike, parti e së majtës në Itali, i cili nuk është aktualisht një deputet, pranoi se në moshën 39-vjeçare ai nuk përmbush kushtin minimal për të qenë anëtar i Dhomës së Lartë të Parlamentit italian. Kjo, pasi mosha minimale për të qenë një senator është 40 vjeç.

Ai u tha senatorëve se kërkon të nisë reformat në Dhomën e Lartë, jo më vonë se sa muaji i ardhshëm.

Votimi në Senat dhe mazhoranca që Renzi arriti të siguronte, është parë si një test kyç i fuqisë së tij për të bashkuar fraksionet e përçara në Parlamentin italian. Megjithatë, ai dështoi të siguronte një mazhorancë më të lartë se ish-kryeministri Enrico Letta, rivali i tij në parti, të cilin e largoi nga detyra në fillim të këtij muaji.

Letta mori 173 vota pro në Dhomën e Lartë me 320 vende, në Dhjetor të vitit të kaluar.

Qeveria e përbërë nga 16 ministra, në të cilën gjysma janë femra, ka një moshë mesatare nën 48 vjeç, më e reja në historinë moderne të Italisë.

Renzi, i cili është edhe kryebashkiak i Firences, tha të hënën para Senatit se Italia, ekonomia e tretë më e madhe e eurozonës, duhet ta marrë më seriozisht luftën me financat publike të saj.

Këtë nuk e them për shkak të presionit nga Kancelarja gjermane, Angela Merkel, apo nga kreu i Bankës Qendrore Europiane, tha Renzi, por sepse “duhet të punojmë në respekt për fëmijët tanë”.

Renzi parashtroi gjithashtu disa kërkesa:

– Kalimin e menjëhershëm të një serie reformash elektorale dhe kushtetuese, për të rikthyer besueshmërinë në politikë.
– Shkurtime në taksimin e pagave deri në fund të Qershorit, për ta bërë më të lehtë për kompanitë që të rekrutojnë stafin.
– Rritjen e pagesave të mirëqenies së të papunëve.
– Krimin e një programi për ndërtimin e shkollave.
– Të konsiderohet rritja e taksave mbi të ardhurat financiare të investimeve, për të paguar për reformën e punësimit

Kryeministri i ri italian emëroi një kabinet thuajse të panjohur jashtë Italisë, teksa Pier Carlo Padoan – ish-kreu i Organizatës për Zhvillim dhe Bashkëpunim Ekonomik (OECD) – ka marrë postin e ministrit të Ekonomisë, ndërsa koleges së tij në parti, Federica Mogherini i ka dhuruar postin e ministres së Jashtme, të mbajtur më parë nga Emma Bonino.

Dy figura të biznesit italian, Federica Guidi dhe Giuliano Poletti, kanë marrë portofolet e Industrisë dhe Punësimit.

Top Channel