Itali, betohet Qeveria “Renzi”

Mungonte ministri i Ekonomisë, i cili është në udhëtim në Sindej, ku ndodhet për punimet e G20 dhe kështu do të betohet më pas.

Anëtarët e ekzekutivit të ri, të përbërë nga 16 ministra, tete prej të cilëve gra, morën pjesë në ceremoninë e kalimit të pushtetit në duart e Kryeministrit të ri. Pjesë e kësaj ceremonie ishte edhe dorëzimi simbolik i një zileje, që përdoret në mbledhjen e Këshillin e Ministrave.

Bëri përshtypje klima e akullt mes Matteo Renzi-t dhe kryeministrit të mëparshëm Enrico Letta, i cili evitoi qoftë edhe një shikim me pasardhësin e tij.

Mesa bëhet e ditur, zgjatja e takimit të një dite më parë me presidentin e Republikës, me të cilin Renzi bisedoi më shumë se dy orë e gjysmë, ka patur në qendër heqjen e Emma Bonino-s nga posti i ministres së Punëve të Jashtme.

Kreu i shtetit është treguar skeptik mbi këtë zgjedhje, duke vënë në dukje periudhën jo të lehtë që po kalojnë marrëdhëniet ndërkombëtare, ndërsa Kryeministri i ri ka dashur të japë një mesazh të fortë rinovimi edhe jashtë Italisë.

Ditën e hënë parashikohet paraqitja e programit qeveritar në Senat dhe votëbesimi në këtë dhomë të Parlamentit. Ditën e martë po e njëjta procedurë, po në Dhomën e Deputetëve.

Top Channel