Parlamenti turk është bërë sërish arenë përleshjes mes ligjvënësve të opozitës dhe atyre të pozitës dhe shkak këtë herë ishte kalimi me votat e maxhorancës të një reforme në drejtësi.
Sipas CNN turk reforma në drejtësi synon forcimin e kontrollit të qeverisë mbi sistemin e drejtësisë. Ekzekutivi i Erdogan dhe sistemi i drejtësisë ishin protagonistë të përplasjes më të fundit ku të afërm të kabinetit përfunduan në pranga nën akuzën për korrupsion.
Kjo nxiti kundërveprimin e ekzekutivit që shkarkoi prokurorët dhe shefat e policisë në shumë qytete të vendit me po të njëjtën akuzë.
Votimi në sallë u shoqërua me debate të ashpra mes deputetëve, debate që përfunduan në përleshje fizike.
Pak më shumë se një javë më parë në të njëjtën sallë deputetët u përleshën sërish me njëri-tjetrin dhe shkak ishte një ligj i kaluar nga partia e kryeministrit Erdogan që rrit kontrollin e shtetit mbi internetin.
Ligji është kritikuar edhe nga organizmat ndërkombëtare si shkelje e lirive dhe të drejtave të njeriut. Ky ligj dhe reforma në sistemin e drejtësisë ka ngjallur reagimin e opozitës që akuzon Erdogan se po vendos diktaturën në vend.
Top Channel
