Putin: S’u mësojmë të tjerëve si të jetojnë

Fjalia e konsideruar gjërësisht si një kritikë e tërthortë ndaj Shteteve të Bashkuara të Amerikës, u lëshua nga presidenti rus, Vladimir Putin gjatë fjalimit vjetor drejtuar kombit para Asamblesë Federale në Moskë.

Putin u ndal edhe tek kriza e fundit politike në Ukrainë dhe rolit të Rusisë në të. Ai mohoi ekzistencën e një presioni nga ana e Kremlinit që Kievi t’i bashkohet unionit doganor rus së bashku me Bjellorusinë dhe Kazakistanin.

“Shpresoj në gjetjen e një zgjidhje të krizës politike në Ukrainë. Ukraina ka mundësi, të zgjedhë nëse do të jetë pjesë e unionit doganor, ose të mos e bëjë dicka të tillë. Askush s’e detyron”, tha Putin.

Lidhur me gjendjen ekonomike të vendit, shefi i Kremlinit kritikoi autoritetet vendore për keqzbatim ose moszbatim të reformave të propozuara prej tij një vit e gjysmë më parë.

“Reformat që janë ndërmarrë që prej një viti e gjysmë tashmë, ose janë zbatuar në një mënyrë që ka provokuar reagime negative kundrejt tyre, ose nuk janë zbatuar fare”, tha ai.

Presidenti rus u ndal edhe tek tensionet ndëretnike dhe sulmet me sfond racor në Rusi.

“Një prej problemeve më thelbësore që ne duhet të dialogojmë është edhe problemi i etnive të ndryshme në vendin tonë. Pjesa më e madhe e sulmeve racore ndodhin për shkak të problemeve ekonomike dhe zhvillimit të territorit, korrupsionit dhe punës së qeverive lokale, sikundër edhe dështimi i sistemit kulturor dhe edukativ”, deklaroi Putin.

Top Channel