SHBA, sondazhet ndëshkojnë republikanët

Sipas sondazhit të CNN, të publikuar të martën, 64% e amerikanëve thonë se kanë një këndvështrim jo favorizues për republikanët, një shifër rekord e të gjitha kohërave kjo, që prej vitit 1992, kur CNN nisi të bënte sondazhe të tilla.

Vetëm 3 nga 10 amerikanë shfaqnin opinione në favor të forcës politike, kundërshtare të Obamës.

56% e tyre thonë se nuk kanë pëlqim ndaj lëvizjes “Tea Party”, një tjetër rekord në historinë e sondazheve të CNN. Ndërkohë, vetëm 28% e tyre thonë se lëvizja konservatore 4-vjeçare është duke ecur në rrugën e duhur.

Vlerësimet ndaj Partisë Demokratike, me 43% në favor dhe 51% në disfavor, janë pothuajse të pandryshueshme nga muaji i kaluar, pikërisht përpara mbylljes së pjesshme dhe të përkohshme të qeverisë federale.

Sondazhi u krye nga e premtja deri të dielën, pas përfundimit të “shutdown”-it 16-ditor të qeverisë, që rrezikoi edhe falimentimin e mundshëm të SHBA-ve, deri në orët e fundit të afatit të skadimit, i cili shënoi edhe mbylljen e parë të qeverisë në këto 17 vjet.

***
Boehner u tha republikanëve të Dhomës së Përfaqësuesve, në fund të “shutdown”-it, se “ne u përpoqëm të fitonim këtë betejë, por thjesht nuk mundëm”. Megjithatë, sondazhet tregojnë se ai nuk ka fituar zemrat dhe mendjet e shumicës së amerikanëve. Përqindja e mospëlqimit ndaj Boehner është tashmë 55%, nga 48% që ishte në shtator.

“Kjo është hera e parë, që kreu i Dhomës nuk pëlqehet nga shumica e amerikanëve”, thotë drejtoresha e sondazhit, Keating Holland. “Ndërsa homologu i tij në Senat, lideri i shumicës Harry Reid, sheh një rënie të mospëlqimit ndaj tij, me një diferencë të vogël, pas grindjeve për çështjet buxhetore”.

Pëlqyeshmëria e Boehner ka rënë me 9% mes republikanëve dhe 8% mes konservatorëve.

Edhe Mitch McConnel, lider i republikanëve të Senatit, dhe senatori Ted Cruz i Teksasit, ideatori i bllokadës ndaj “ObamaCare” dhe tavanit të borxhit, kanë parë një rritje të theksuar të mospëlqimit.

***

Hillary Clinton ruajti një pozicion asnjanëse dhe jo aktiv gjatë krizës së buxhetit. Ndaj dhe sondazhet tregojnë se amerikanët janë në favor të saj me 59%, kundrejt 37% të atyre që kanë shprehur mospëlqim, në sondazhin e ri, pothuajse të pandryshuara që nga muaji maj, kur CNN i pyeti amerikanët të jepnin mendimin e tyre për shpresat e kandidimit për Presidente nga demokratët, në vitin 2016.

Më shumë se 9 nga 10 demokratë e shohin Clinton-in me këndvështrim pozitiv, ashtu siç janë edhe të pavarurit (ata që nuk përkrahin as demokratët dhe as republikanët), respektivisht 53% në favor dhe 42% në disfavor. Ndërkaq, më shumë se 7 në 10 republikanë nuk e preferojnë ish-zonjën e parë, ish-Sekretaren amerikane të Shtetit dhe senatoren e Neë York-ut.

Top Channel