Itali, ligj kundër dhunës në familje

Bëhet fjalë për një dekret ligj me vetëm 12 nene të bazuara mbi tre pika: parandalim, ndëshkim dhe mbrojtje.

Ministri i Punëve të Brendshme, Angelino Alfano ilustroi të rejat e dekretit që ashpërson ndjeshëm legjislacionin në këtë fushë.

Parashikohet arrestimi në vend në rastet e keqtrajtimit në familje dhe të persekutimit fizik e psikologjik.

Forcave të policisë u kërkohet që të largojnë nga nga banesa bashkëshortin e dhunshëm dhe ta mbajnë atë sa më larg partneres së dhunuar.

Një e re edhe për gratë e huaja të cilat nëse janë pa dokumente qëndrimin dhe bëhen objekte të dhunës në familje, kanë të drejtë të marrin një lejeqëndrimi për arsye humanitare.

Dekreti ndalon tërheqjen e padive për dhunë, gjë e rëndësishme kjo sepse shpesh nga frika apo për të mbrojtur fëmijët, gratë e dhunuara në një moment të dytë e tërhiqnin padinë apo kërkesën për mbrojtje.

Sipas Organizatës Botërore të Shëndetsisë në Itali llogaritet që rreth gjashtë milionë e gjysmë gra pësojnë dhunë fizike, seksuale apo psikologjike dhe prej tyre vetëm 7% ngre padi.

Një plagë sociale në radhë të parë për shkak të viktimave që shkakton, por edhe të rrjedhojave ekonimike.

Në Itali shpenzohen rreth dy miliardë euro e gjysmë për të përballuar kostot e drejtpërdrejta dhe anësore të dhunës kundër grave.

Top Channel