Egjipti mbyll tunelet me Rripin e Gazës

Tunelet janë përdorur nga Kajro për t’i ardhur në ndihmë popullsisë palestineze në një seri bllokadash dhe bombardimesh izraelite në vitet e fundit, por ato janë bërë tashmë tepër problematike për marrëdhëniet midis Egjiptit e Izraelit, si dhe për sigurinë në vend.

Nuk është e qartë se si do të veprojnë autoritetet egjiptiane për të shkatërruar këto nënkalime, por në të shkuarën është përdorur përmbytja si një mjet efikas për prishjen e kanaleve.

Besohet se ekzistojnë disa qindra tunele, të përmasave të mëdha dhe të vogla, në hapësirën e madhe të shkretëtirës së Sinait, ku përcaktohet edhe kufiri izraelito-egjiptian.

Vendimi i Egjiptit për të mbyllur tunelet përbën një goditje të rëndë për palestinezët e Gazës, të punësuar me mijëra në këtë aktivitet. Ata e kanë konsideruar këtë formë komunikimi me Egjiptin si jetike për ta, sidomos në kohërat e bllokadave.

Izraeli ka këmbëngulur me forcë për mbylljen e këtyre rrugëkalimeve, duke spekuluar se ato përdoren nga organizata terroriste e Hamasit, për të përfituar armë dhe raketa me anë të së cilave sulmohet Izraeli.

Top Channel