Dhunonte mbesën, pranga 44-vjeçares

Arrestimi është bërë pas denoncimit të nënës së vogëlushes në polici, Donika Qiriako, 42 vjeçe. Sipas burimeve zyrtare të policisë së kryeqytetit, halla e ka rrahur 3-vjeçaren, me inicialet K.Q, pas një konflikti të çastit, për motive të dobëta.

Ndër të tjera mësohet se Mimoza Qirjako nuk ka zbatuar vendimin për urdhrin e mbrojtjes të Gjykatës së Rrethit Gjyqësor të Tiranës, e cila ka vendosur që kjo shtetase të mos kryente vepra dhune në familje. Në korrik të këtij viti, nëna e 3-vjeçares e ka paditur kunatën e saj në Gjykatën e Tiranës, duke pretenduar se Mimoza, në mënyrë sistematike ushtronte dhunë fizike dhe psikologjike mbi vajzën, duke e trembur vazhdimisht.

Çështja pushohet, pasi 44-vjeçarja ka deklaruar përpara trupit gjykues se nuk ka ushtruar dhe nuk do të ushtrojë dhunë fizike e psikologjike ndaj mbesës së saj. Garancinë se nuk do të ushtronte dhunë ndaj 3-vjeçares, ajo e ka shoqëruar edhe me shkrim. Por nuk ka rezultuar kështu.

Në shtator të këtij viti, kunatat përplasen sërish në dyert e Gjykatës, për të njëjtën çështje. Nëna e vogëlushes është ankuar se Mimoza Qiriako nuk e ka respektuar vendimin, për të mos i prekur fëmijën, përkundrazi ka vijuar dhunën psikologjike dhe fizike mbi 3-vjeçaren. Sërish 44-vjeçarja e ka mohuar këtë fakt, duke thënë se e kunata po gënjen, madje ajo është e lumtur që është bërë me mbesë. Pasi Gjykata ka dëgjuar të dyja palët, ka lëshuar një urdhër mbrojtje ndaj së paditurës Mimoza Qiriako, që të mos kryejë veprën e dhunës në familje, ndaj fëmijës K.Q, të cilin 44-vjeçarja duket se e ka thyer. Mësohet se të dyja kunatat jetojnë në të njëjtin apartament pas martesës që Donika ka pasur me vëllanë e Mimozës. Fëmija me inicialet K.Q, është fëmija i vetëm i Donika Qiriakos dhe ardhja në jetë e vogëlushes ka acaruar marrëdhëniet mes kunatave.

Top Channel