KS, Hoxhaj: Serbia mban veriun në status kuo

Hoxhaj tha se, në shkelje të rezolutës 1244, Serbia vijon të mbajë atje policinë, strukturat ilegale dhe barrikadat, duke kontribuar kështu në përkeqësimin e situatës.

Për rrjedhojë, u shpreh Hoxhaj, situata aktuale është bërë pengesë për zbatimin e planit të Ahtisarit për veriun, që sipas tij mund të integrojë serbët e veriut në shoqërinë civile dhe institucione.

“Axhenda e Serbisë në këtë pjesë të Kosovës është mbajtja e status kuosë dhe krijimi i kushteve për një konflikt të ngrirë dhe ndarje territoriale”, tha Hoxhaj, ben te ditur RTK.

“Për shkak të kësaj situate është bërë e pamundur për qeverinë kosovare që të integrojë serbët e veriut dhe të zbatojë planin e Ahtisarit në këtë zonë të vendit”, vijoi ai.

Më tej, shefi i diplomacisë kosovare akuzoi Serbinë se, pavarësisht se nënshkroi marrëveshjet me Kosovën në Bruksel, nuk po bën asgjë për t’i zbatuar ato në terren.

Ndërkohë, ministri i Jashtëm serb, Vuk Jeremiç akuzoi institucionet e Kosovës se po kërcënojnë komunitetin serb që jeton në veri, me veprime të cilat ai i cilësoi si të qëllimshme.

Jeremiç deklaroi se, ekstremistë shqiptarë po pengojnë arritjen e një zgjidhjeje paqësore dhe përmendi disa incidente të shkaktuara sipas tij nga qeveria kosovare, si arrestimi i pjesëtarëve të MUP.

Top Channel