Aleanca Kuq e Zi: Berisha keqpërdor identitetin kombëtar

Sipas AKZ, përmes këtyre deklaratave, kryeministri kërkon të largojë vëmendjen nga problemet e vërteta që ka aktualisht vendi.

“Berisha flet përçart kur thotë se kemi lidhje gjaku me turqit. Me këto deklarata Berisha kërkon të largojë vëmendjen nga gjendja e vendit. Berisha harron se jemi në krizë ekonomike”, kane deklaruar drejtues te Aleances.

Grupimi i drejtuar nga ish-nënkryetari i KLD-së Kreshnik Spahiu ka nënvizuar se kryeministri Berisha po përdor identitetin kombëtar për interesa personale.

Aleanca ka shtuar më tej, se 100-vjetorin e pavarësisë nga Turqia do ta festojë pa Berishën, por me një delegacion të përbërë nga pasardhësit e presidentit Willson.

“Shqipëria dhe shqiptarët janë simbol i civilizimit perëndimor. Rruga e shqiptarëve do të ecë sipas demokracisë evropiane dhe asaj amerikane”, ka përfunduar Aleanca Kuq e Zi në reagimin e saj.

Muajin e kaluar Aleanca u regjistrua si parti në gjykatën e Tiranës, duke shprehur ambicjen e saj për të garuar si një subjekt politik në zgjedhjet e ardhshme parlamentare.

Po muajin e kaluar, Aleanca akuzoi qeverinë dhe ministrin e Inovacionit, Teknologjisë, Informacionit dhe Komunikimit, Genc Pollo se kanë dërguar në Athinë të dhënat zyrtare të censusit dhe nuk po e publikojnë atë për shkak se janë në pritje të direktivave greke.

Ndërsa në fillim të prillit, në përvjetorin e Dëshmorit të Kombit Indrit Cara, Aleanca Kuq e Zi organizoi një manifestim përkujtimor në qytetin e Kavajës nga ku kreu i saj etiketoi si tradhtarë të interesave të vendit klasën sunduese aktuale të grumbulluar rreth kreut të PBDNJ-së, Vangjel Dule.

Top Channel