Izrael, raketa godet qytetin e Eilatit
05/04/2012 08:30
Rrëzimi i avionit në Lituani, ngrihen dyshime se mund të jetë i lidhur me sabotim 25/11 22:20
Një raketë ka goditur qytetin jugor të Izraelit, Eilat, por për fat të mirë pa shkaktuar dëme në njerëz, njoftuan forcat izraelite të sigurisë.
Shefi i policisë lokale, Ron Gertner deklaroi për mediat izraelite se raketa është qëlluar nga gadishulli egjiptian i Sinait. Sipas tij, ajo goditi një impiant ndërtimi pranë një zone të banuar, fare pak momente pas mesnatës.
Shpërthimi i shkaktuar nga raketa ndodhi kur mijëra qytetarë ishin mbledhur në qytet për të festuar një festë tradicionale vendase.
Sulmet me raketa nga gadishulli egjiptian i Sinait janë të rralla. Sulmet në Eilat dhe në qytetin fqinj jordanez të Akabës në vitin 2010 vranë një person dhe plagosën katër të tjerë.
Kryetari i bashkisë së Eilatit, Yitzhak-Halevy tha për agjencinë “Jerusalem Post” se qyteti do të vazhdojë jetën normale pavarësisht sulmit. Së fundmi në Sinai janë regjistruar një seri trazirash.
Izraeli deklaron se militantët janë bërë aktivë në këtë rajon që kur ish-presidenti egjiptian Hosni Mubarak ra nga pushteti në shkurt të vitit 2011. Në gusht të të njëjtit vit, një grup i armatosur kaloi kufirin për në Izrael nga gadishulli i Sinait dhe vrau tetë izraelitë.
Top Channel
