Kriza, Barroso: Koha e vendimeve

Kështu ka deklaruar presidenti i Komisionit Evropian, Jose Manuel Barroso, në një letër drejtuar liderëve të Bashkimit Evropian, në kuadër të samitit të së premtes.

Por apeli i zotit Barroso ka shkuar dëm, pasi samiti mes liderëve të eurozonës është anuluar, lajm ky që është bërë i ditur nga burime evropiane.

Hipotezë për dështimin e takimit është bërë rezistenca e Gjermanisë për të diskutuar mbi fuqizimin e fondit të shpëtimit të vendeve të Bashkimit Evropian.

“Samiti i eurozonës nuk është thirrur kurrë, por është e vërtetë që ekzistonte hipoteza se ai mund të mblidhej. Megjithatë, tani kjo hipotezë ka rënë”, ka deklaruar një zyrtar i BE-së.

“Diskutimi mbi fondin e shpëtimit të shteteve dhe fuqizimin e tij do të bëhet brenda muajit mars, me siguri në nivel ministrash të eurogrupit”, ka saktësuar zyrtari.

Sipas tij, momenti i vetëm i parashikuar mes 17 liderëve të zonës euro është ai i së enjtes mbrëma, ku do të emërohet Herman van Rompuy president i Eurosamitit.

Përveç presidentit të Eurosamitit, që është formati që do të mbledhë krerët e shteteve dhe qeverive të zonës së monedhës së përbashkët dy herë në vit, Van Rompuy do të konfirmohet edhe për një mandat si president i BE-së.

Deri tani është konfirmuar mbledhja në nivel ministrash të Financave ditën e enjte, për të diskutuar mbi implementimin e marrëveshjes prej 130 miliardë eurosh për Greqinë.

Top Channel