Kryeministri i Egjiptit, Kamal Ganzouri, theksoi vendosmërinë e tij për të vazhduan hetimin e organizatave joqeveritare në vend, pavarësisht kërcënimeve amerikane për tërheqjen e ndihmës ekonomike.
43 aktivistë pro-demokratikë, midis tyre edhe 19 amerikanë, rrezikojnë burgosjen, si pasojë e hapjes së organizatave të tyre pa një liçensë dhe me financime të konsideruar si ilegale prej Kajros zyrtare.
Ganzouri shtoi se do të hetohet gjithashtu roli që kanë patur organizata të ndryshme në protestat e dhunshme që përfshinë Egjiptin gjatë 2011-s, duke shkaktuar mbi 800 viktima.
Megjithatë, një grup senatorësh amerikanë paralajmëruan për rrezikun e një “thyerje të pandreqshme” të marrëdhënieve midis dy vendeve, pikërisht në momentin kur ato janë më të ngrohta se kurrë.
John McCain, Kelly Ayotte dhe Joe Lieberman konsideruan se kundërshtarët e Shteteve të Bashkuara brenda qeverisë egjiptiane janë duke i hedhur “benzinë zjarrit”, për të përshkallëzuar tensionet dhe për të vendosur opinionin publik kundër amerkanëve.
Nga ana e saj, Sekretarja Amerikane e Shtetit, Hillary Clinton, paralajmëroi se çdo procedim i organizatave apo shtetasve amerikanë në Egjipt, do të bënte Uashingtonin të rishikonte ndihmën ekonomike prej 1,3 miliardë dollarësh që vendi i madh afrikan merr për armatime dhe prej 250 milionë dollarësh për ekonominë.
Egjipt, ushtarakët largohen në qershor
Ushtarakët do të jenë të gjithëpushtetshëm në Egjipt deri në fund të qershorit, ashtu sic është parashikuar edhe më herët.
Kështu deklaroi kryeministri në fuqi, Kamal el Ganzouri i cili hodhi poshtë të gjithë zërat dhe kërkesat e shtuara së fundmi nga disa parti politike të dala nga zgjedhjet që përfunduan në janar në vend.
“Kush apelon për largimin e ushtarakëve nga udhëheqja e vendit duhet të sjellë në kujtesë atë që ndodhi në Irak. Egjipti është shtylla kurrizore e të gjithë rajonit dhe duhet t’u sqarohet të gjithëve se rrëzimi i kombit tonë, rrëzon të gjithë rajonin, trazirat në kombin tonë, trazojnë të gjithë rajonin”, tha kryeministri el-Ganzouri.
Deklarata ishte kundërpërgjigje e kërkesave të disa partive politike në vend, përfshi këtu edhe salafitët, radikalët islamikë që në zgjedhjet e përfunduara muajin e kaluar u konfirmuan si partia e dytë më e madhe në vend, pikërisht pas liberalëve të “Vëllazërisë muslimane”.
Kërkesat kanë nxitur edhe dhunë në vend. Në disa rajone, përfshirë këtu edhe periferi të Kajros, ka patur përleshje mes protestuesve që kërkojnë largimin e ushtarakëve nga qeverisja e vendit, dhe forcave të sigurisë.
Top Channel
