Drejtuesja për Europën në Grupin Ndërkombëtar të Krizave, Sabin Frejzër thotë se ndryshimi i proçedurave të numërimit të votave në Shqipëri sado i drejtë mund të duket në pamje të parë, do të ndryshonte rregullat e lojës dhe do ta fuste vendin në kaos.
“Në një garë e tillë kaq e ngushtë që praktikisht përfundoi në barazim – thotë ajo – fituesi duhet të përcaktohet nga zbatimi me rigorozitet maksimal i rregullave të miratuara më parë”.
“Kodi Zgjedhur nuk e jep të qartë se si duhen trajtuar këto fletë-votime. Por gjatë zgjedhjeve të vitit 2007 dhe 2009, ata janë trajtuar si të pavlefshme. Ekspertët i kishin kërkuar KQZ-së që të sqaronte që përpara zgjedhjeve statusin e fletëve të hedhura në kuti të gabuara, por KQZ-ja nuk e bëri dot këtë”, thotë ajo.
Gjatë seancave të trajnimit, thotë ajo, komisionerëve iu tha që t’i konsideronin këto vota si të pavlefshme dhe shumica e komisionerëve e përfunduan në këtë mënyrë proçesin e numërimit në Tiranë dhe në qytetet e tjera.
Mosmarrëveshja pritet t’i kalojë Kolegjit Zgjedhor.
Komuniteti ndërkombëtar – thotë analistja e Grupit të Krizave, Sabine Frejzër, duhet të kërkojë haptazi nga kandidatët Basha dhe Rama të angazhohen qartazi për të respektuar vendimin e Kolegjit Zgjedhor.
“Komisioni Evropian, shton ajo, duhet të tërheqë rekomandimin që Shqipërisë t’i jepet statusi i vendit kandidat, nëse ka dhunë të shoqëruar me viktima gjatë protestave pas zgjedhjeve”.
Top Channel
