Jemen, tërhiqet Saleh

Një zyrtar, që preferoi të mbetet anonim për mediat, tha për CNN se Saleh dhe opozita jemenase, që kërkon largimin e tij, kanë rënë dakort sipas një marrëveshje të hartuar nga gjashtë vendet e Gjirit Persik. Në marrëveshje parashikohet tërheqja e tij nga pushteti brenda 30 ditëve dhe garantimi i imunitetit nga hetimet e mëvonshme për të dhe të gjithë zyrtarët e lartë që shërbyen gjatë regjimit të tij.

Marrëveshja parashikon gjithashtu formimin e qeverisë së bashkimit kombëtar brenda 7 ditëve nga nënshkrimi i saj.

Në fillim të muajit, Saleh i propozoi opozitës vendase reforma kushtetuese për demokratizimin e vendit dhe mbajtjen e zgjedhjeve parlamentare dhe presidenciale në fund të këtij viti, kur premtoi se nuk do të rikandidonte. Por kjo ofertë e Saleh u hodh poshtë nga opozita që kërkonte largimin e menjëherëshëm të tij nga pushteti.

Tashmë mbetet për t’u parë nëse vija e mesme e propozuar nga vendet e Gjirit Persik, të cilat në javët e fundit, nëpërmjet ministrave të jashtëm janë angazhuar tejmase për arritjen e një marrëveshje mes opozitës dhe presidentit Saleh për të shmangur tensionimin e mëtejshëm të situatës në Jemen, do të bëhet zyrtare.

Top Channel