Zbulohet “Banesa e vjetër”

Mes të arrestuarve dy nga pjesëtarët e këtij grupi janë të mitur e për këtë policia raporton vetëm inicialet e tyre dhe jo identitetin e plotë.

Policia dyshon se grupi përdorte si bazë të veten një kasolle në periferi të kryeqytetit, në Sharrë, atje ku më parë grumbulloheshin plehrat.

Pikërisht me emrin “Banesa e vjetër” u kodua edhe operacioni, i cili jo zyrtarisht mësohet të ketë nisur pas informacioneve për disa të rinj që kishin grumbulluar armë në Sharrë, por që përfundoi në zbulimin e një grupi që përdorte si taktikë për t’i shpëtuar policisë, pas vjedhjeve me motorë dhe paruke flokësh.

Sipas drejtorit të Policisë së Tiranës, Saimir Muçaj, në pranga janë vënë shtetasit: Saimir Fari Thaci, 29 vjeç, lindur dhe banues në Tiranë, i dënuar më parë për tentativë vjedhje; Jetnor Idriz Gaxha, 26 vjeç, lindur në Has dhe banues në Tiranë; M. M, 17 vjeç, lindur dhe banues ne Tiranë; Liridon Femi Mena, 19 vjeç, lindur në Dibër dhe banues në Tiranë; O. S, 16 vjeç, lindur dhe banues në Tiranë.

Në bazën e të dyshuarve për një seri vjedhjesh që nisin nga automjetet, banesat e përfundojnë tek bankat, u gjetën gjashtë automatikë, katër motora të vjedhur në Durrës e Tiranë, një maskë plastike, 30 çelësa motoçikletash e makinash si dhe kaçavida e pinca të shumta. Për të zbuluar se çfarë ka grabitur konkretisht ky grup të rinjsh, pritet të zbardhet nga hetimet e mëtejshme.

Top Channel