Një ngjarje e jashtëzakonshme ka tronditur qytetin Ballshit kur në mbrëmjen e së hënës mbi 150 persona përfunduan në spital si pasojë e problemeve që shfaqen në mënyrë të menjëhershme.
Sipas të dhënave në spitalin e qytetit u paraqitën shumë persona. Kapaciteti prej 30 shtretërish i spitalit ndodhet i mbushur, por fluksi ka ardhur gjithmonë e në rritje ku vetëm brenda ditës së hënë kanë marrë mjekim 150 persona, veç 50 personave që u paraqitën ditën e dielë dhe 25 të shtunën.
Mjekët e spitalit të Ballshit sqarojnë se qytetarët paraqiten me të vjella si pasojë e helmimit dhe u nënshtrohen serumeve për rreth 2-3 orë e më pas nisen për në banesat e tyre.
Autoritetet vendore ende nuk kanë konfirmuar zyrtarisht nëse uji i pijshëm ka qenë shkaku i helmimit të qytetarëve, por të prekurit pretendojnë se është pikërisht uji i pijshëm i ndotur shkak i helmimit të tyre, pretendim ky që përforcohet edhe nga fakti që ndërmarrja e furnizimit me ujë të pijshëm në qytetin e Ballshit ka ndërprerë furnizimin për këtë qytet.
Hetimet kanë nisur nga një grup ekspertësh të Ministrisë së Shëndetësisë, ndërkohë që në vendngjarje ka mbërritur edhe ministri i Shëndetësisë, Petrit Vasili.
Top Channel
